Paparoma ya yi kira da a kawo karshen zaluncin yaki, da azabtar da jama'a a Gaza
Kamfanin dillancin labaran iqna ya habarta cewa, ya nakalto daga shafin sadarwa na yanar gizo na cibiyar yada labaran Falasdinu cewa, an kashe mutane uku tare da raunata wasu da dama ciki har da wani limamin coci a wani hari da aka kai a cocin Holy Family da ke birnin Gaza a ranar Alhamis.
Paparoma ya ce, "Ina kira ga kasashen duniya da su mutunta dokokin jin kai da kuma wajibcin kare fararen hula, da kuma kaucewa hukumta jama'a, da yin amfani da karfi ba gaira ba dalili, da kuma tilasta wa mutane gudun hijira."
Tun da farko dai kungiyar gwagwarmayar Musulunci ta Hamas ta yi Allah wadai da harin bam da Isra'ila ta kai a cocin Monastery na yankin Gaza da ke Gaza, inda ta ce wani sabon laifi ne kan wuraren ibada da 'yan gudun hijira.
A cikin wata sanarwa da kungiyar ta fitar ta ce 'yan mamaya ne suka kai wa cocin hari "a matsayin wani bangare na yakin da ake yi na lalata al'ummar Palasdinu a dukkan bangarorinta."
Fadar White House ta kuma sanar da cewa shugaban Amurka Donald Trump ya nuna rashin jin dadinsa da harin a wata tattaunawa ta wayar tarho da firaministan Isra'ila Benjamin Netanyahu.
A cewar mai magana da yawun fadar White House, Trump ya bayyana lamarin a matsayin "babban kuskure" ya kuma yi kira ga Netanyahu da ya fitar da wata sanarwa a hukumance ta bayyana abin da ya faru.
