Pinalalawak ang mga Gawaing Quraniko sa Malaking Paglalakbay ng Arbaeen
Ang Quran at ang Mas Mataas na Sentro ng Pamilya ng Iranianong Kagawaran ng Kultura at Islamikong Patnubay ang nagdaos ng pagtitipon na dinaluhan ng mga kinatawan mula sa iba’t ibang mga ahensiyang kaugnay ng paglalakbay ng Arbaeen.
Binigyang-diin ng mga kalahok ang pangangailangang palawakin nang malaki ang mga gawaing nakatuon sa Quran tuwing taunang paglalakbay ng Arbaeen at inilatag ang mga plano para rito.
Sa kanyang pahayag, binanggit ni Hojat-ol-Islam Hamid Reza Arbab Soleimani, kintawan para sa Quran at Etrat ng Kagawaran ng Kultura, ang Talata 32 ng Surah Hajj: “At sinumang nagdadakila sa mga palatandaan ng Allah, tunay nga, ito ay mula sa kabanalan ng mga puso,” at inilarawan niya ang prosisyon ng Arbaeen bilang isa sa natatanging mga halimbawa ng banal na mga palatandaan at isang kakaiba at walang kapantay na kaganapan sa makabagong mundo.
Ipinahayag niya na ang Arbaeen ay kahalintulad ng pag-aalsa ng Ashura, ngunit ang kaibahan ng dalawa ay nasa uri ng jihad: “Ang Ashura ay sagisag ng jihad militar, at ang Arbaeen ay manipestasyon ng pangkulturang jihad. Sa pareho, makikita ang mga konsepto tulad ng pagtitiyaga, paglaban, paghahanap ng tama, liwanag ng kaalaman, paghangad ng katarungan, pagpapanatili ng mga adhikain, at pag-alala sa mga bayani.”
Sinabi niya na ang batayan ng banal na kilusan ng Ashura at Arbaeen ay nakasalig sa mga aral ng Quran at ng sambahayan ng Propeta (SKNK).
Ibinahagi niya ang tiyak na mga mungkahi para sa pagpapaunlad ng mga gawaing Quraniko sa panahon ng prosisyon ng Arbaeen.
Kabilang dito ang pagpapalawak ng mga sentrong Quraniko at mga Moukib. Binigyang-diin din niya ang pangangailangan para sa mga tagapagsalita at mga orador na magtuon hindi lamang sa pagbasa kundi pati sa pagninilay ng kahulugan ng Quran.
Magbasa Pa:
• 1,500 Iraniano na mga Kumboy na Quraniko ang Naglingkod sa Prosisyon ng Arbaeen
Kasama rin sa iba pang mungkahi ang paggawa ng mga programang pangmidya tungkol sa Quran, pagpapalawak ng mga kumboy na Quraniko na may paglalahok ng publiko, at ang pagbubuo sa alaala ng mga piling Surah ng Quran katulad ng Surah Fajr at Surah Fath.
Nanawagan din siya para sa paggawa ng isang pormal na dokumento na naglalahad ng mga gawaing Quraniko para sa Arbaeen.
Si Hojat-ol-Islam Alireza Panahian, isang propesor sa unibersidad at pinuno ng International Arbaeen Foundation, ay nagsalita rin sa pagpupulong. Binigyang-diin niya ang natatanging potensiyal ng kaganapan at inilarawan ang malaking paglalakbay bilang angkop na larangan para sa pagpapalaganap ng kulturang Quraniko.
Ayon kay Panahian, kung hindi maisasanib ang Quran sa mga puso ng tao, hindi ito maisusulong nang maayos. “Ang Arbaeen ay ang pinakamahusay na pagkakataon para sa espirituwal na ugnayan ng puso ng mga tao sa Quran at Ahl-ul-Bayt (AS).”
Nagbigay siya ng isang tiyak na mungkahi. Iminumungkahi na sa panahon ng martsa ng Arbaeen, magkaroon ng mga sesyon ng Khatm Quran (pagbasa ng buong Quran), at ang gantimpala ng pagbasa nito ay ialay sa mga yumao, lalo na sa mga bayani, ayon kay Panahian.
Tinapos ni Panahian sa pamamagitan ng pag-uugnay ng mga aral ng Quran sa pangunahing layunin ng prosisyon ng Arbaeen. “Kung walang pagbibigay-pansin sa mga aral ng Ahl-ul-Bayt (AS), nawawalan ng saysay ang mga pagtitipong Quraniko.”
Magbasa Pa:
• Itinampok ang Kakayahan ng mga Kumboy na Quraniko ng Arbaeen na Ipakilala ang Quranikong Katauhan ni Imam Hussein
Nagbigay rin ng kanilang mga rekomendasyon ang ibang mga dumalo. Iminungkahi ni Mahmoud Vaezi, isang propesor sa unibersidad, ang pagdaos ng buhay na mga programa kasama ang pandaigdigan na mga tagapagbasa at mga paligsahan ng Quran sa mga Moukib.
Binigyang-diin ng mga kinatawan mula sa ibang mga komite at ng Himpilang Quraniko ang kahalagahan ng pagsuporta sa mga grupong nasa pinakapayak na antas at paggamit sa kapasidad ng mga kawanggawa. Nanawagan sila ng mas maayos na koordinasyon sa pagitan ng mga institusyong Quraniko ng Iran at ng mga tagapag-ayos ng mga Moukib na naglilingkod sa mga peregrino sa kahabaan ng ruta.
Nagtapos ang pagpupulong sa isang pagkakasundo hinggil sa pangangailangang magkaroon ng higit pang pagkakaisa sa pagitan ng mga institusyong pangkultura at Quraniko. Ang layunin ay maiangat ang antas espirituwal at intelektuwal ng malaking paglalakbay.
Ang Arbaeen ay isang panrelihiyong kaganapan na isinasagawa ng mga Shia Muslim sa ika-apatnapung araw matapos ang Araw ng Ashura, bilang paggunita sa pagkabayani ni Imam Hussein (AS), ang apo ni Propeta Muhammad (SKNK) at ikatlong Imam ng Shia.
Isa ito sa pinakamalaking taunang paglalakbay sa mundo, kung saan milyon-milyong mga Shia Muslim, gayundin maraming Sunni at tagasunod ng iba pang mga relihiyon, ang naglalakad patungong Karbala mula sa iba’t ibang mga lungsod sa Iraq at mga karatig na bansa. Sa taong ito, ang araw ng Arbaeen ay tumapat noong Agosto 14.
Mahigit 4 na milyong mga peregrino mula sa Iran ang lumahok sa prosisyon ng Arbaeen noong 2025.
