Бино ба гузориши икно, бо истинод ба «Gulf News», барои 29-умин давраи Ҷоизаи байналмилалии Қуръони Карими Дубай аз 135 кишвар 20 500 дархост пешниҳод шудааст. Ин бузургтарин иштироки байналмилалӣ дар таърихи баргузории ин озмун ба шумор меравад.

Рекорди шумораи дархостҳо пас аз анҷоми сабти ном барои давраи соли 1448 ҳиҷрии қамарӣ / 2027 мелодӣ, ки таҳти ҳимояти Шайх Муҳаммад бин Рашид Ол Мактум, нахуствазири Амороти Муттаҳидаи Араб ва ҳокими Дубай, баргузор мешавад, ба даст омад.

Ин афзоиши назаррас пас аз тағйироте ба вуҷуд омадааст, ки дар доираи сиёсати рушди ин ҷоиза таҳти шиори «Дар ҷустуҷӯи зеботарин тиловати Қуръон дар ҷаҳон» амалӣ шудаанд. Аз ҷумла, ба афрод иҷозат дода шудааст, ки мустақиман барои иштирок дар озмун дархост пешниҳод кунанд. Пеш аз ин, сабти ном асосан тавассути кишварҳои худ ё марказҳои исломии эътирофшуда анҷом дода мешуд.

Ҳамчунин барои ин озмун фонди ҷоиза ба маблағи беш аз 12 миллион дирҳами аморотӣ (3,3 миллион доллар) муқаррар шудааст, ки бузургтарин маблағ дар таърихи ин озмун мебошад. Дар гурӯҳбандии иштирокчиён, шартҳои довталабӣ, раванди арзёбӣ ва механизмҳои иштирок низ тағйирот ворид карда шудааст.

Миср бо пешниҳоди 6 838 дархост дар ҷойи аввал қарор гирифт. Пас аз он Индонезия бо 1 923, Покистон бо 1 862 ва Сурия бо 1 511 дархост қарор доранд.

Дар бахши мардони иштирокчии беш аз 16-сола, 14 040 дархост қабул шудааст. Дар бахши мардон ва занони то 16-сола бошад, 6 495 дархост ба қайд гирифта шудааст, ки аз ин шумора 2 394 нафар духтарон мебошанд.

Аҳмад Дарвиш Ал-Маҳирӣ, мудири кулли Идораи корҳои исломӣ ва фаъолияти хайриявии Дубай ва раиси ҳайати сарпарастони Ҷоизаи байналмилалии Қуръони Карими Дубай, гуфт, ки ин рекорди иштирок нишондиҳандаи таъсири равиши нави озмун ва густариши доираи байналмилалии он мебошад.

Бар асоси сохтори нави ҷоизаҳо, ғолиби ҷойи аввал дар ҳар яке аз ду бахши асосӣ 1 миллион доллар дарёфт хоҳад кард. Ғолибони ҷойи дуюм 100 ҳазор доллар ва ҷойи сеюм 50 ҳазор доллар мегиранд. Ҷоизаи «Шахсияти ҷаҳонии Қуръонӣ» низ ба маблағи 1 миллион доллар муқаррар шудааст.

Яке аз навгониҳои дигари давраи 29-ум даъват намудани қориёни ниҳоии интихобшуда барои иштирок дар намозҳои масҷидҳои бузурги Дубай дар моҳи Рамазон мебошад. Сипас, бо истифода аз раъйдиҳии умумӣ, «зеботарин тиловати Қуръон дар ҷаҳон» интихоб карда мешавад.

Айни замон довталабон дар марҳилаи ибтидоӣ аз рӯи риояи қоидаҳои таҷвид, сифати овоз, тарзи тиловат ва иҷрои умумӣ арзёбӣ мешаванд. Барои иштирокчиёни аз 16-сола боло, онҳое, ки марҳилаи аввалро бо муваффақият паси сар мекунанд, ба марҳилаи раъйдиҳии умумӣ роҳ меёбанд ва қориёни ниҳоии интихобшуда дар моҳи Рамазон ба Дубай даъват хоҳанд шуд. Қарор аст раъйдиҳӣ аз 8 то 16 феврали соли 2027 баргузор шавад.

Барои иштирокчиёни то 16-сола, марҳилаи дуюм тавассути доварии мустақими видеоӣ аз 1 то 14 сентябри соли 2026 баргузор мешавад. Сипас, қориёни ниҳоӣ аз 8 то 16 феврали соли 2027 ба марҳилаи раъйдиҳии умумӣ роҳ меёбанд.

Аз замони оғози баргузории ин озмун, дар 28 давраи он дар маҷмӯъ 7 826 иштирокчӣ аз 123 кишвар ширкат кардаанд. Ин барнома аз замони баргузории давраи аввалаш беш аз 67 миллион дирҳам ҷоизаи пулӣ тақдим кардааст. Ҳамчунин 24 нафар ва 3 муассиса дар доираи ҷоизаи «Шахсияти ҷаҳонии Қуръонӣ» мавриди қадрдонӣ қарор гирифтаанд.

4370851