استاد عبدالباسط؛ پیدائش سے وفات تک
ایکنا نیوز، الیوم السابع نیوز کے مطابق اس فلم کی تیاری اسلامی ورثے کی دستاویز سازی اور مصر کے عظیم قاریوں کی تلاوتی خدمات کو ہمیشہ کے لیے محفوظ کرنے کے میدان میں ایک بے مثال کامیابی ہے، جس میں آرٹیفیشل انٹلی جنس کی جدید اور پیچیدہ ترین ٹیکنالوجیز سے فائدہ اٹھایا گیا ہے۔
یہ فلم کئی دنوں کی باریک بینی اور مسلسل محنت کے بعد تیار کی گئی ہے تاکہ استاد عبدالباسطؒ کی سوانحِ حیات کو پیش کرنے میں اعلیٰ ترین معیار، روحانیت اور وقار کو یقینی بنایا جا سکے۔
یہ منصوبہ مصر کے وزیرِ اوقاف اسامہ الازہری کی سرپرستی میں مکمل ہوا، جبکہ مصر کی اعلیٰ اسلامی امور کونسل کے سیکریٹری جنرل محمد البیومی نے فلم کی تاریخی اور دینی صحت کو یقینی بنانے کے لیے اس کے مواد کی نگرانی کی۔
اعلیٰ اسلامی امور کونسل کے سرکاری ڈیجیٹل چینلز پر جاری ہوتے ہی اس فلم کو عالمِ اسلام کے مختلف حصوں سے بھرپور عوامی پذیرائی ملی۔
ناظرین نے مصنوعی ذہانت کے نہایت دقیق استعمال، شبیہ سازی کی صحت اور استاد عبدالباسطؒ کی زندگی کے مختلف مراحل کی پُراثر منظر کشی کو سراہا۔
اس کامیابی کے ذریعے مصر کی اعلیٰ اسلامی امور کونسل نے دینی تعلیم اور دستاویز سازی میں ایک نئے اسلوب کی بنیاد رکھی ہے، جس میں ٹیکنالوجی کو قرآنِ کریم اور اس کے علما و قاریوں کی خدمت کے لیے بروئے کار لایا جا رہا ہے۔
کونسل کو امید ہے کہ یہ فلم دیگر عظیم مصری قاریوں کی زندگیوں پر مبنی اسی نوعیت کے مزید منصوبوں کا آغاز ثابت ہوگی، جنہوں نے اپنی تلاوت کے ذریعے دنیا بھر میں گہرے اثرات چھوڑے ہیں۔ یہ کامیابی اللہ کی کتاب کی اصیل تلاوت کے فن کے تحفظ اور فروغ میں مصر کے قائدانہ کردار کی عکاس ہے۔
اس فلم کی تیاری میں شامل ٹیم میں اسلام محمد الاقصری (پروڈیوسر)، ممدوح عبدالغنی اور محمود مختار مہنا (ایڈیٹنگ)، اور محمد عسکر (ساؤنڈ ریکارڈسٹ) شامل ہیں۔/
3495774
