حرم مطھر رضوی کا ہفتہ وار قرآنی پروگرام

ایکنا: حرمِ مطہر امام رضاؑ کے قرآنی خصوصی پروگرام آستانہ قدسِ رضوی کے ادارہ دارالقرآن الکریم کی کاوشوں سے باقاعدہ اور ہفتہ وار بنیادوں پر اس نورانی بارگاہ کے صحنوں، رواقوں اور دارالقرآن میں منعقد کیے جا رہے ہیں۔

ایکنا کی رپورٹ کے مطابق، آستانِ قدسِ رضوی کے دارالقرآن الکریم کے یہ پروگرام قرآنِ کریم سے انس و وابستگی کے فروغ اور زائرین و مجاورین کے مختلف طبقات کو قرآنی معارف سے مستفید کرنے کے مقصد سے ترتیب دیے گئے ہیں۔ ان پروگراموں میں بچوں اور نوجوانوں سے لے کر بڑوں تک مختلف عمر کے افراد شامل ہوتے ہیں۔

حرمِ مطہر رضوی کے اہم ترین قرآنی پروگراموں میں رواقِ امام خمینیؒ میں روزانہ سورۂ مبارکہ یٰس کی ترتیل کے ساتھ تلاوت، دارالقرآن الکریم میں بچوں کے لیے رضوی قرآنی محفل، نوجوانوں کے لیے کرسیِ تلاوت رضوی، دارالحجۃ میں عیون اخبارالرضاؑ کے ساتھ محفلِ انس، نوجوانوں کے لیے قرآن میں تدبر کے ورکشاپس اور اساتذہ کی موجودگی میں قرآنِ کریم کی تلاوت کی نشستیں شامل ہیں۔

اسی طرح دارالقرآنِ خواتین کے خصوصی پروگراموں میں روایتی تلاوت کی نشستیں، خواتین کے لیے مخصوص قرآنی محافل اور رواقِ حضرت فاطمہؑ میں قرآنِ کریم حفظ کرنے کے ورکشاپس کا انعقاد کیا جاتا ہے۔ ان پروگراموں کے ساتھ ساتھ کم عمر بچوں کے لیے صبح اور شام کے اوقات میں قرآنی ورکشاپس بھی رکھی گئی ہیں۔

ان تمام قرآنی محافل اور نشستوں کے اوقات اور مقامات کی مکمل تفصیل دارالقرآن الکریم حرمِ مطہر رضوی کی جانب سے جاری کردہ اطلاع رسانی تصویر میں فراہم کی گئی ہے، جس کے ذریعے دلچسپی رکھنے والے افراد پروگراموں کی تفصیلات سے آگاہ ہو سکتے ہیں۔

حرمِ مطہر رضوی ان پروگراموں کے مسلسل انعقاد کے ذریعے یہ کوشش کر رہا ہے کہ امام رضاؑ کے اس ملکوتی آستانے پر حاوی روحانی فضا کو قرآنِ کریم کی تلاوت اور اس میں تدبر کی خوشبو سے مزید وسیع اور گہرا کیا جائے۔/

4323947