ملایشین اسلامی مشاورتی کونسل کی جانب سے رھبر معظم کی حمایت
ایکنا نیوز- العالم نیوز چینل کے مطابق ملائیشیا کی اسلامی تنظیموں کی مشاورتی کونسل (ماپیم) نے ایک بیان میں حالیہ ایران میں پیش آنے والی منتشر بدامنیوں کے نتیجے میں ہونے والی ہلاکتوں، تباہ کاریوں اور عدم استحکام کے حوالے سے ڈونلڈ ٹرمپ کو ذمہ دار قرار دینے کے بارے میں رہبرِ معظم کے مؤقف کی حمایت کی ہے۔
ملائیشیا کی اسلامی تنظیموں کی مشاورتی کونسل کی جانب سے جاری بیان میں کہا گیا ہے کہ ایران میں حالیہ پیش رفت کو بیرونی مداخلت، احتجاجات کی منصوبہ بندی اور انہیں مسلح کرنے کے معروف نمونے کے تناظر میں دیکھا جا سکتا ہے؛ ایسا عمل جس نے دنیا کے مختلف خطوں میں عام شہریوں کو شدید نقصان اور تکلیف سے دوچار کیا ہے۔ بیان کے مطابق ایران میں حالیہ بدامنیوں کے دوران سول احتجاجات کا رخ تشدد کی طرف موڑ دیا گیا، جس میں عام شہریوں، سکیورٹی فورسز اور عوامی بنیادی ڈھانچے کو نشانہ بنایا گیا؛ اور اگر اس طرح کے اقدامات کی بیرونی انٹیلیجنس ادارے رہنمائی یا حمایت کریں تو یہ جغرافیائی سیاسی جنگ کا آلہ بن جاتے ہیں۔
اس اسلامی ادارے نے مائیک پومپیو اور صہیونی حکومت کے انٹیلیجنس اداروں کی جانب سے جاری بیانات اور پیغامات پر بھی شدید تشویش کا اظہار کیا، جن میں بدامنیوں کی حمایت بلکہ بعض مقامات پر زمینی سطح پر موجودگی کے دعوے بھی کیے گئے۔ ماپیم نے ان اقدامات کو قومی خودمختاری اور بین الاقوامی قوانین کی صریح خلاف ورزی قرار دیا۔
ماپیم نے جمہوریت کے دعویداروں کے دوہرے معیار پر تنقید کرتے ہوئے زور دیا کہ وہ عناصر جو اپنے ہی ممالک میں احتجاجات کو کچلتے ہیں، قبضے، محاصرے اور جنگی جرائم پر خاموش رہتے ہیں، مگر دوسروں کو عدم استحکام کی دعوت دیتے ہیں—یہ طرزِ عمل آزادی کے تصور کے آلہ کار اور غلط استعمال کی علامت ہے۔
بیان کے اختتام پر ماپیم نے قومی خودمختاری کے اصولوں، بیرونی مداخلت کی مخالفت اور عام شہریوں کی جان کے تحفظ پر زور دیتے ہوئے عالمی برادری سے مطالبہ کیا کہ نام نہاد نظاموں کی تبدیلی کی پالیسیوں کو ترک کیا جائے، بین الاقوامی قوانین کی پاسداری کی جائے اور مکالمے و کشیدگی میں کمی کے راستے کو اختیار کیا جائے۔
