جامع مسجد جامع البانیہ دوبارہ کھول دی گئی
ایکنا نیوز- المسلمون حول العالم نیوز کے مطابق اسلامی ورثے کو اس کی عثمانی شناخت کے ساتھ محفوظ رکھنے اور تاریخی شہروں کی کشش میں اضافے کے لیے کی جانے والی مشترکہ کوششوں کے تناظر میں، گلیدیان لاتیا (میئر البسان)، شیخ آجیم دوکا (مفتی البسان) اور ترکی تعاون و رابطہ ایجنسی (TIKA) کے نمائندوں نے شہر کے وسط میں واقع تاریخی قلعہ کے علاقے میں مسجدُ الملک کے مرمتی کام کا جائزہ لیا۔
انہوں نے اس بات پر زور دیا کہ مرمت کا کام آخری مراحل میں ہے اور اس سے جلد ہی مسجد کو نمازیوں اور زائرین کے لیے دوبارہ کھولنے کی راہ ہموار ہو جائے گی۔
مسجدُ الملک البسان کی اہم ترین تاریخی عمارتوں میں شمار ہوتی ہے، جو وسطی البانیا میں اسلام کی ابتدائی موجودگی کی گواہ ہے۔ یہ مسجد نہ صرف شہر کی قدیم ترین مسجد ہے بلکہ ایک ایسی نمایاں معماری عمارت بھی ہے جو پندرھویں صدی عیسوی کے اواخر کے ایک اہم تاریخی دور سے تعلق رکھتی ہے۔ صدیوں سے یہ مسجد ایک مذہبی اور ثقافتی مرکز کے طور پر قائم ہے اور اس کے گرد و نواح پر گہرے اثرات مرتب کرتی رہی ہے۔
میئر البسان نے وضاحت کی کہ قلعہ کے علاقے میں واقع مسجدُ الملک کا دورہ مرمتی منصوبے میں ہونے والی پیش رفت کا جائزہ لینے کے لیے کیا گیا۔
انہوں نے کہا کہ چونکہ یہ منصوبہ تکمیل کے قریب ہے، اس لیے یہ مسجد جلد ہی نمازیوں کے لیے کھول دی جائے گی اور یہ خطے کی عثمانی تاریخ اور معماری میں دلچسپی رکھنے والے سیاحوں اور زائرین کے لیے ایک اہم مقام بن جائے گی۔
میئر البسان نے اس بات پر بھی زور دیا کہ یہ منصوبہ مذہبی مقامات کو ان کے شایانِ شان توجہ دینے اور ساتھ ہی شہر کے ثقافتی ورثے کے تحفظ کے عزم کا مظہر ہے۔ ان کے مطابق یہ تاریخی عمارتیں صرف مسلم برادری کے لیے عبادت گاہیں نہیں بلکہ شہری منظرنامے کے بنیادی عناصر ہیں جو ماضی کو حال سے جوڑتی ہیں اور شہر کی قدر و اہمیت کو رہائشیوں اور زائرین دونوں کے لیے بڑھاتی ہیں۔
انہوں نے مزید کہا کہ مسجد کی مرمت، قلعہ کے علاقے کی بحالی کے منصوبے کے ساتھ ساتھ جاری ہے، جو ایک ایسی جگہ ہے جس کی اپنی شناخت، تاریخ اور ثقافتی سیاحت کے لیے نمایاں صلاحیت موجود ہے۔ یہ اقدام مقامی معیشت کے لیے نئے امکانات پیدا کرتا ہے اور البسان شہر کو البانیا کے ثقافتی سیاحتی نقشے پر ایک نمایاں مقام دلانے میں مدد دے گا۔
