Kərbəlada üç beynəlxalq virtual Quran kursu keçirilib
"İQNA"-nın verdiyi xəbərə görə, bu kurslar "Quran kampaniyası: İmam Hüseyn (ə) haqqında ayələr", "Nurul Quran: İmam Mehdi (ə) haqqında ayələr" və "Elmin ilk və son açarları: Quran ənənələri" başlıqları altında həyata keçirilirdi. Kurslara İraq, Küveyt və Səudiyyə Ərəbistanından olan Quran tələbələri qatılıb.
Bu kurslar İmam Hüseyn (ə) Türbəsinin Quran Mərkəzinin Elmi işlər üzrə vitse-prezidenti Seyyid Mürtəza Cəmaləddinin nəzarəti altında təlim videoları, səs yazıları və PDF faylları vasitəsilə təklif olunub.
Bildirilib ki, virtual kurs proqramları Quran kursantlarına bu elmi məzmunlardan bəhrələnmək imkanı verir və sonda iştirakçıların qiymətləndirilməsi üçün Seyyid Mürtəza Cəmaləddinin nəzarəti altında imtahanlar keçiriləcək.
Mövzu ilə bağlı danışan Seyyid Mürtəza Cəmaləddin bu kursların Əhli-Beytin (ə) həyatından bəhs edən ayələr vasitəsilə iştirakçılar ilə Qurani-Kərim arasındakı bağlılığı gücləndirmək üçün təşkil edildiyini bildirib. O, İmam Hüseyn (ə) Türbəsinin Quran Mərkəzinin hədəflərinə uyğun olaraq Quran mədəniyyətinin yayılması üçün elmi məzmunun təqdim edildiyini də vurğulayıb.
Seyyid Mürtəza Cəmaləddin bu kurslarda internetin ən son vasitələrindən istifadə edildiyini və kursların uğurunun gənc nəsillərə Quran dəyərlərinin aşılanmasına yönəlmiş daha əhatəli layihələrin başlanğıcı olduğunu bildirib.
Məlumat verilib ki, İmam Hüseyn (ə) Türbəsinin Quran Mərkəzi Quranın yüksək prinsip və dəyərlərinin qorunub saxlanılması məqsədilə müasir və innovativ üsullarla maarifləndirici proqramların hazırlanması, virtual Quran təhsilinin gücləndirilməsi istiqamətində səylərini davam etdirir.
4254079
