FaktXəbər-in verdiyi məlumata görə, Səid terrorçulara internet vasitəsi ilə qoşulub. Əvvəlcə o özü Bəşər Əsəd hökumətinin guya həyata keçirdikləri vəhşiliklərlə bağlı yayılan videolara baxıb, sonra isə onu «müqəddəs müharibəyə» cəlb edən terrorçularla tanış olur.
Suriyaya nə ailəsi, nə də hamilə yoldaşı Mədinəyə xəbər vermədən gedir. Lakin orada baş verənlərlə virtual həqiqətlər arasında dərin uçurumu gördüyü ilk gündə qayıtmaq istəyir. Ancaq pasportunun olmaması və güclü nəzarət onun bu arzusunu bir neçə ay gecikdirir: «İnternetdə göstərilənlərlə orada baş verənlər tamam zidd şeylərdir. Əslində hökumətə zidd qüvvələr qarətlə, digər cinayətlərlə məşğul olur və mənim kimiləri aldadırlar. Sərhəddə pasportumu aldılar. Dedilər ki, qanunlar belədir. Hamı öz pasportunu verdi. Sonra isə heç kimi ala bilmədi. Pasportun qaytarılması üçün ya, yaralanmalı, ya da Türkiyəyə getmək üçün ciddi bir səbəbin olmalı idi».