Fələstin Mövzulu Beynəlxalq Konfrans İsveçrədə Keçiriləcək
"İQNA"-nın "Minanews"-a istinadən verdiyi xəbərə görə, bu konfrans İsveçrə hökumətinin nəzarəti altında təşkil ediləcək və əhəmiyyətli siyasi nəticələr doğurması gözlənilir. Konfransda sionist rejimin silahlandırılmasının qadağan olunmasına dair çağırışlar ediləcəyi ehtimal olunur.
Birləşmiş Millətlər Təşkilatının Baş Assambleyası İsveçrə hökumətinə bu konfransı mülki vətəndaşların müdafiəsi, İsrailin Fələstin torpaqlarındakı işğalı və bu mövzuda beynəlxalq öhdəliklərə diqqət yetirərək təşkil etmək səlahiyyəti verib.
İsveçrə, Cenevrə Konvensiyalarının nəzarətçi ölkəsi olaraq, bu razılaşmalarla bağlı sənədləri qorumaq və imzalayan ölkələrə dəstək verməkdə mühüm rol oynayır. Həmçinin münaqişələrdə tərəfsiz mövqe nümayiş etdirir.
Daha əvvəl 1999, 2001 və 2014-cü illərdə İsveçrədə üç Fələstin konfransı təşkil edilmişdir. 2014-cü il konfransı İsrailin Qəzza Zolağında apardığı 50 günlük müharibədən sonra keçirilmişdir.
Cenevrə Konvensiyasına tərəf olan ölkələr ilk iki konfransda Şərqi Qüds də daxil olmaqla, işğal altındakı ərazilərdə dördüncü Cenevrə Konvensiyasının tətbiqini tələb etmişlər.
Dördüncü Cenevrə Konvensiyası işğal altındakı ərazilərdə və ya işğalçı qüvvənin nəzarətində olan mülki şəxslərin müdafiəsini təmin edir. Konvensiyanın 49-cu maddəsi işğalçı dövlətə mülki əhalini zorla köçürmək və ya işğal altındakı ərazilərdən çıxarmaq hüququ tanımır.
İsveçrə konfransı məcburi qərarlar qəbul edə bilməsə də, Fələstin məsələsində beynəlxalq humanitar hüquq qaydalarını və mövcud Cenevrə Konvensiyasının üzv dövlətlər üzərindəki məsuliyyətlərini gücləndirə bilər.
