İmam Hüseyn (ə) zülmə qarşı müqavimət simvoludur
Şaban ayının 3-ü İmam Hüseynin (ə) mövlud günü hesab olunur. Bu özəl gün təkcə mövlud günü deyil, həm də İmam Hüseynin (ə) bəşəri dəyərlər, ədalət, azadlıq və haqq uğrunda apardığı mübarizənin yad edilməsi günüdür.
İmam Hüseynin (ə) həyatı təkcə İslamın ilk illərində baş verən siyasi qarşıdurmaların əksi deyil, həm də bəşəriyyət üçün ümumbəşəri dəyərləri müdafiə edən mövqeyin simvoludur. Onun Kərbəlada şəhid olması onun zalımlara qarşı mövqeyinin və inandığı dəyərlərə sədaqətinin simvolu oldu. Ona görə də İmam Hüseynin (ə) mövludu təkcə bayram deyil, həm də onun mübarizəsini, fədakarlığını və haqq-ədalət uğrunda ömürlük mübarizəsini anlamaq üçün bir fürsətdir.
Bu gün İmam Hüseynin (ə) mövludu münasibəti ilə onun həyatından dərslər və təlimlər insanları daha ədalətli və vicdanlı bir cəmiyyət yaratmaq üçün ilhamlandırır.
İmam Hüseyn (ə) hicri 4-cü il şaban ayının 3-də (miladi 626) Mədinədə anadan olmuşdur. Atası Həzrət Əli (ə) və anası Həzrət Fatimədir (s). İmam Hüseyn (ə) Həzrət Məhəmmədin (s) nəvəsidir.
İmam Hüseynin (ə) həyatı xüsusilə şiə müsəlmanlar üçün böyük məna daşıyır. İmam Hüseyn (ə) təkcə rəhbər deyil, həm də şücaətin, ədalətin, mərhəmətin, insani dəyərlərin ən ali nümayəndəsidir. Hər il, xüsusilə Məhərrəm ayında Kərbəlada baş verən hadisələr yad edilir, İmam Hüseynin (ə) mübarizəsi yad edilir. İmam Hüseynin (ə) təlimləri bizə tövsiyə edir ki, həmişə zalımın qarşısında dayanaq, ədalətin ardınca getək və haqq-ədalət uğrunda mübarizəni davam etdirək.
