İsrail əsgərlərinin diplomatlara atəş açmasına reaksiya
Fələstin İnformasiya Mərkəzinin verdiyi məlumata görə, İsrail ordusunun Cenin əyalətində Avropa və Ərəb diplomatik nümayəndə heyətlərinə qarşı mübahisəli hücumundan sonra bəzi Avropa ölkələri hadisəyə cavab olaraq İsraildəki səfirlərini çağıracaqlarını açıqlayıblar.
İtaliyanın xarici işlər naziri Cenin hadisələri ilə bağlı rəsmi açıqlama vermək üçün İsrailin Romadakı səfirini çağırdığını açıqlayıb.
Misir Xarici İşlər Nazirliyi də insidenti “ən sərt şəkildə” pisləyib və atışmanın “bütün diplomatik normaları” pozduğunu bildirib.
İrlandiyanın baş nazirinin müavini, xarici işlər və müdafiə naziri Saymon Harris İsrail ordusunun Cenin Qaçqınlar Düşərgəsi yaxınlığında diplomatlardan ibarət nümayəndə heyətinə atəş açmasını “qətiyyətlə pislədiyini” bildirib.
“Ramallahda yerləşən iki irlandiyalı diplomatın da olduğu bir qrup diplomatın Ceninə səfəri zamanı İsrail ordusu tərəfindən atəşə tutulması xəbərindən şoka düşdüm və dəhşətə gəldim”, - Harris X-də yazıb.
Almaniya işğal altındakı İordan çayının qərb sahilində Ceninə səfər edən 35 diplomatın İsrail əsgərləri tərəfindən atəşə tutulmasını şiddətlə qınayıb.
Almaniya Xarici İşlər Nazirliyindən verilən yazılı açıqlamada, “İsrail ordusu bir alman diplomatı və Ramallah missiyasından bir sürücü də daxil olmaqla, qeydiyyatdan keçmiş diplomatik nümayəndə heyətinə atəş açıb. Xarici İşlər Nazirliyi bu səbəbsiz atışmanı şiddətlə qınayır. Biz xoşbəxtik ki, bundan daha pis bir hadisə baş vermədi”.
Fransanın xarici işlər naziri Jan Noel Barrot İsrail ordusunun Cenin Qaçqınlar Düşərgəsi yaxınlığında diplomatların da olduğu nümayəndə heyətinə atəş açmasına reaksiya verib və İsrailin Parisdəki səfirinin hadisə ilə bağlı açıqlama vermək üçün Xarici İşlər Nazirliyinə çağırılacağını açıqlayıb.
Türkiyə Xarici İşlər Nazirliyi Cenin şəhərinə səfəri zamanı Türkiyənin Qüdsdəki Baş Konsulluğunun rəsmisi də daxil olmaqla bir qrup diplomata İsrail əsgərlərinin atəş açmasını ən sərt şəkildə pisləyib.
Diplomatların həyatını riskə atan bu hücum İsrailin beynəlxalq hüquqa və insan haqlarına sistemli şəkildə məhəl qoymamasının növbəti nümunəsidir. Diplomatların hədəfə alınması təkcə fərdi təhlükəsizliyə deyil, həm də dövlətlər arasında münasibətlərin əsasını təşkil edən hörmət və etimad mühitinə ciddi təhlükə yaradır”.
Norveçin xarici işlər naziri Espen Barth Eide, İsrail ordusunun Cenin Qaçqınlar Düşərgəsi yaxınlığında diplomatlardan ibarət nümayəndə heyətinə atəş açmasını pisləyib.
“İsrail ordusunun Cenində bir qrup diplomata hücumunu qınayıram” deyən Eide, İsrailin bu hərəkətinin qəbuledilməz olduğunu və beynəlxalq hüququ pozduğunu bildirib.
Belçika Xarici İşlər Nazirliyi İordan çayının qərb sahilinin Cenin şəhərində İsrail əsgərlərinin, aralarında Belçika diplomatının da olduğu bir heyətə atəş açması ilə bağlı Təl-Əviv hökumətindən inandırıcı izahat gözlədiklərini bildirib.
Finlandiya xarici işlər naziri həmçinin Cenin düşərgəsində diplomatik nümayəndə heyətinə atəş açılmasını təhlükəli və qınanılası hadisə kimi qiymətləndirib.
Fələstin xarici işlər nazirinin müavini Dik İsrailin İordan çayının qərb sahilində və Qəzza zolağında fələstinlilərə qarşı hücumlarına son qoymağa və İsraili məsuliyyətə cəlb etməyə çağırıb. Xarici İşlər Nazirliyi hücuma “Diplomatların hədəfə alınması təkcə fərdi təhlükəsizliyə deyil, həm də dövlətlər arasında münasibətlərin əsasını təşkil edən hörmət və etimad mühitinə ciddi təhlükə yaradır” deyə cavab verib.
4283995
