Qəzzada 40 min körpə aclıqdan ölüm təhlükəsi ilə üz-üzədir
“Əl-Cəzirə” kanalının məlumatına əsasən, Hökumət Media İdarəsi verdiyi bəyanatda bildirib ki, Qəzza zolağı 150 gündür davam edən süd tozu idxalının qadağan olunması səbəbindən, misli görünməmiş bir humanitar fəlakətin astanasındadır və bu vəziyyət on minlərlə körpənin həyatını təhlükəyə atır. Qurum, işğalçıları, soyqırımda rol oynayan ölkələri və beynəlxalq ictimaiyyəti bu sistemli mühasirə nəticəsində həyatını itirən hər bir günahsızın ölümündə tam məsuliyyət daşıyan tərəflər kimi tanıyıb.
Digər tərəfdən, Birləşmiş Millətlər Təşkilatının Uşaq Fondu (UNICEF) bazar ertəsi xəbərdarlıq edərək bildirib ki, Qəzza zolağında hər kəs aclıq çəkir, lakin ən çox əzab çəkənlər uşaqlardır; qəzzalı oğlan və qız uşaqları məktəbə getmək əvəzinə, bir parça yemək tapmaq ümidi ilə həyatlarını riskə atırlar.
Avropa-Aralıq dənizi İnsan Haqları Müşahidə Təşkilatı da bu gün verdiyi bəyanatda bildirib: “Qəzzada aclıq yaradan və aclığı mülki insanlara qarşı silah kimi istifadə edən İsrailin heç bir humanitar əməliyyatda iştirak haqqı yoxdur”. Bəyanatda əlavə olunub ki, etibarlı yardım təşkilatlarına Qəzza zolağında fəaliyyətlərini bərpa etməyə imkan verilməli, İsrail isə onların zəruri humanitar fəaliyyətləri həyata keçirməsinə şərait yaratmalıdır.
Bundan əlavə, bu gün Qəzzada yerləşən Əl-Şəfa Tibb Kompleksinin direktoru bildirib ki, son 24 saat ərzində aclıq və qidalanma çatışmazlığı səbəbindən, ikisi uşaq olmaqla, 14 nəfər şəhid olub.
O qeyd edib ki, Qəzza zolağında aclıq və qidalanma çatışmazlığı səbəbindən şəhid olanların ümumi sayı 147 nəfərə çatıb.
Fələstin Səhiyyə Nazirliyi bazar günü, İsrail rejiminin davam edən hücumları və sərt mühasirəsi nəticəsində şəhid olanlar və yaralılarla bağlı son statistik məlumatları açıqlayıb. Məlumata görə, 7 oktyabr 2023-cü ildən indiyədək İsrail rejiminin hücumları nəticəsində şəhid olanların ümumi sayı 59 min 821 nəfər, yaralananların sayı isə 144 min 851 nəfər olub.
4296821
