İranın Cənubi Koreya səfirinə Quran hədiyyə edildi
“İQNA” müxbirinin məlumatına görə, Asiya və Okean üzrə tələbə məsələlərində Ali Liderin nümayəndəsi Hacı Həsən Məhəmmədəli Nizamzadə Tehranda Cənubi Koreya səfiri Kim Jun Pyonun iqamətgahında keçirilən İran–Koreya xəttatlıq sərgisində səfirə bir nüsxə Quran və öz şeir kitabını təqdim edib.
Bu sərgi hər iki ölkə arasında diplomatik münasibətlərin qurulmasının 63-cü ildönümü münasibətilə Asiya Əməkdaşlıq Dialoqu Koordinasiya Mərkəzinin (CCCACD) təşkilatçılığı ilə səfirin iqamətgahında keçirilib və sərgidə iki ölkənin xəttatlıq sənət ustalarının “ailə” mövzusunda əsərləri nümayiş olunub.
Sərgidə iranlı sənətkarlar Təndis Təqəvi, İsrafil Şirçi və Müctəba Səbzə iştirak ediblər. Bundan əlavə, 12 koreyalı sənətkar da öz xəttatlıq əsərlərini sərgidə təqdim edib.
Cənubi Koreyanın İrandakı səfiri tədbirdə çıxış edərək bildirib: “Bu gün Koreya Respublikası ilə İran İslam Respublikası arasında diplomatik əlaqələrin qurulmasının 63-cü ildönümüdür. Bu mənalı gündə iki ölkə arasında qədim dostluğu və sənət bağlarını xatırladan ortaq xəttatlıq sərgisinin ev sahibi olmaq bizim üçün böyük şərəfdir.”
O, həmçinin ümidvar olduğunu bildirib ki, bu tədbirdə qurulan dialoqlar iki xalq arasında dostluq və əməkdaşlığın daha da dərinləşməsinə və genişlənməsinə zəmin yaradacaq.
4312432
