Türkiyəli qadın sənətkarların məscidlərin bəzədilməsində təşəbbüsü
“TRT”-nin məlumatına görə, Samsun şəhərindəki bu qadın sənətkarlar məscidlərin daxili bəzəklərini öz sənət bacarıqları və qətiyyətləri ilə yenidən çəkirlər.
Aynur Şəkər, Nazlı Cəzən və İşıq Kahraman bir neçə metrlik iskelelər üzərində işləyərək, məscidlərin tavan və divarlarını mürəkkəb həndəsi və çiçək naxışları ilə bəzəyirlər; bu iş əvvəllər yalnız kişilərin sahəsi sayılırdı.
Onların son layihəsi hazırda Samsunun Salı Pazarı rayonuna aid Karacaören məhəlləsində tikilməkdə olan Suyuk məscidinin bəzədilməsinə həsr olunub.
Aynur Şəkərin sözlərinə görə, onun həyatı o zaman dəyişib ki, aztəminatlı sahibkar qadınları dəstəkləmək üçün nəzərdə tutulan maliyyə proqramı vasitəsilə maddi vəsait əldə edib. O, bildirib ki, bu dəstək ona boya, fırça və digər zəruri ləvazimatları almağa imkan yaradıb, bu da işinin keyfiyyətini və gəlirliliyini artırıb. Şəkər əlavə edib ki, kiçik kreditlər qadınlara maliyyə müstəqilliyi qazanmaq üçün böyük imkanlar yaradır.
Onun həmkarı Nazlı Səzən də oxşar hekayə danışıb. O, iki övladı ilə birlikdə Samsunun Çarşamba bölgəsinə köçüb və orada həyatını yenidən qurmaq üçün kiçik kreditlərdən faydalanıb. Səzən deyib ki, hərçənd yenidən başlamaq çətin idi, lakin bu sənət həm ailəsini dolandırmaq, həm də övladlarını oxutmaq üçün vasitəyə çevrilib.
Bu sənətkar qadınların uğuru ölkədə daha geniş bir hərəkatın göstəricisidir. Belə ki, qadınlar getdikcə daha çox əvvəlcə kişilərə məxsus hesab olunan sahələrdə – tikinti, nəqliyyat və mədəni irsin bərpası kimi işlərdə fəaliyyət göstərirlər. Kiçik kreditlərin və bacarıq təlimlərinin təşviq edildiyi proqramlar bir çox qadınlara iqtisadi müstəqilliyi ənənəvi türk sənətləri ilə birləşdirmək imkanı yaradıb.
4314697
