Belarusiyanın taxta məscidində müsəlman turistlər qarşılanır

İQNA - Belarusiyanın Qrodno şəhərində yerləşən taxta məscid bir əsrdən artıq yaşı olmasına baxmayaraq hələ də ibadət edənləri qəbul edir və özünəməxsus memarlığı ilə hər il turistlərin diqqətini cəlb edir.

“Əl-Əluka” saytının xəbərinə görə, 1884-cü ildə inşa edilən Qrodno şəhərinin taxta məscidi, çətin tarixi şəraitə baxmayaraq bu günə qədər İslam irsini qoruyub saxlaya bilmiş kiçik bir müsəlman icmasının iman və kimliyini təcəssüm etdirir.

Son 150 il ərzində bu məscid fasiləsiz fəaliyyət göstərib və nəsillər boyu burada namaz qılınıb. Şəhərin ümumi 6900 nəfərlik əhalisindən təxminən 500 nəfəri müsəlmandır və onlar bu məscidə xüsusi qayğı ilə yanaşır, onu öz kimliklərinin bir parçası hesab edirlər.

Məscidin memarlığı yerli ənənəvi üslubla sadə bədii elementlərin vəhdətidir ki, bu da ona həm orijinal, həm də gözəl görünüş bəxş edir. Məscidin daxilində kişilər və qadınlar üçün ayrıca namaz otaqları nəzərdə tutulub və onun sadə taxta quruluşu Avropadakı qədim müsəlman icmalarının həyat tərzi və memarlıq üslubunu əks etdirir. Bu məscid həmçinin öz bənzərsiz memarlığı və tarixi dəyərinə görə yerli və xarici turistləri cəlb edir.

Belarus İslam Assosiasiyasının üzvü Şeyx Şabanoviç vurğulayıb ki, Qrodno şəhərinin taxta məscidi bu gün təkcə ibadət yeri deyil, həm də ölkədəki müsəlmanların əsas mədəni və ictimai mərkəzidir. Tezliklə onun yanında yeni bir tədris və mədəniyyət mərkəzinin açılması planlaşdırılır ki, bu da yerli icma ilə əlaqələrin daha da möhkəmlənməsinə xidmət edəcək.

4315706