İslam dünyasının görkəmli xəttatının İSESCO-ya Quran hədiyyəsi
“İQNA”-nın “Morocco”ya istinadla verdiyi xəbərə görə, bu Quran nüsxəsi məşhur xəttat İbn Bəvvabın xətti ilə yazılmışdır və Mərakeşdə universitetin təqaüddə olan ustadı Rətibə əs-Səfriui tərəfindən İSESCO-ya hədiyyə olunub.
İSESCO-nun açıqlamasına görə, əs-Səfriui bu nüsxəni təşkilatın İslam dünyasında əlyazma mirasının qorunması və yayılmasındakı öncül roluna təşəkkür olaraq təqdim edib.
İSESCO-nun baş direktoru Salim ibn Məhəmməd əl-Malik bu barədə deyib: “Bu, təqdirəlayiq bir addımdır; çünki İslam dünyasının əlyazma nüsxələrinin qorunmasına dəstək verən gözəl bir ənənədir və elmin yayılmasına təşviq edir.”
O əlavə edib: “Bu təşəbbüs həmçinin İSESCO-nun mədəniyyət elementlərini məhv və zərərdən qorumaq, müsəlman cəmiyyətlərinin mirasını tanıtmaq və onların mədəni, elmi və sivilizasiya sahəsindəki töhfələrini nümayiş etdirmək rolunu gücləndirir.”
Ustad Rətibə əs-Səfriui Quranın təqdimetmə mərasimində izah edib ki, bu nüsxə ona mərhum qardaşı Seyid Əbdülhəyy əs-Səfriuidən çatıb və Quranın bəzi surələrinin mənalarının fransız dilinə tərcümə olunmuş kitabçası ilə birlikdədir.
İSESCO bildirib ki, İbn Bəvvab hicri III–IV əsrlərin ən görkəmli xəttatlarından biri hesab olunur. O, nəsx xəttinin yazı prinsiplərini inkişaf etdirmiş və hər bir hərfin ünsürləri arasında estetik nisbətləri müəyyənləşdirmişdir.
O, 64 Quran yazmışdır ki, onların ən məşhuru yalnız bir nüsxə şəklində günümüzə qədər gəlib çatmışdır. Bu Quran hicri 391-ci ildə Bağdadda köçürülmüşdür və hazırda İrlandiyanın paytaxtı Dublin şəhərindəki Çester Bitti Kitabxanasında saxlanılır. İSESCO-ya təqdim edilən nüsxə də həmin Qurandan götürülmüşdür.
4325176
