2025: Fransadakı müsəlmanların ən çətin ili
“İQNA”-nın “əş-Şuruq” qəzetinə istinadən verdiyi məlumata görə, Paris Böyük Məscidinin rəhbəri Şəmsəddin Hafiz (Chems-eddine Mohamed Hafiz) ötən ili Fransadakı müsəlman cəmiyyətinin din əsasında silinmə nöqtəsinə qədər çatmış böyük çətinlikləri səbəbilə, bədən və ruh üzərində dərin təsir qoyan illərdən biri kimi təsvir edib.
O, bir neçə terror hadisəsinə işarə edərək, nəticədə bir sıra müsəlmanların öldürüldüyünü və Fransa rəsmilərinin bu hadisələr qarşısında susqunluğunu tənqid edib.
Şəmsəddin Hafiz Paris Böyük Məscidinin rəsmi hesabında yazıb: “Elə illər var ki, heç bir iz qoymadan keçir, amma elə illər də var ki, bədən və ruhda iz buraxır; səs-küyləri ilə deyil, ruhun dərinliklərində qoyduqları izlərlə. Ötən il Fransadakı müsəlmanlar üçün həmin illərdən biri idi – ağır və çətinliklərlə dolu bir il.”
O, Fransada bir məsciddə namaz qıldığı zaman gənc bir müsəlman kişinin irqçi motivlərlə vəhşicəsinə öldürülməsini xatırladıb.
Bu hadisə, Fransanın sabiq daxili işlər naziri Bruno Rotayonun (sağçı qanaddan) izahsız xəyanəti fonunda baş verib. O, nə qətlə yetirilən şəxsin ailəsi ilə görüşməyə, nə də cinayət yerinə (məscidə) getməyə cəhd göstərib. Bu, müsəlman cəmiyyətində qəzəb doğurub və mərhumun ailəsi hadisədən iki gün sonra Rotayonu qəbul etməkdən imtina edib.
Hafiz vurğulayıb: “Bu insan yalnız müsəlman olduğu üçün öldürüldü. Onun ölümü susqunluqla qarşılandı, sanki bəzi həyatları digərlərindən daha tez silmək mümkündür. Bu susqunluq dərin təsir qoydu, yaxınlarının kədərindən çox-çox uzağa gedən bir iz buraxdı.”
O, həmin il etnik və dini əsaslarla baş vermiş digər qətllərə də şahid olduqlarını qeyd edib, məsələn, Tunisli bir miqrantın Fransa polisi tərəfindən öldürülməsi.
Hafiz həmçinin Fransada islamofobiyanın misilsiz səviyyələrə çatdığını vurğulayıb və xəbərdarlıq edib: “Bu faciələrdən əlavə, nadir hallarda üzə çıxan, lakin kökləri çox dərin olan bir islamofobiya mühiti mövcuddur.”
Paris Böyük Məscidinin rəhbəri bildirib ki, bu vəziyyət müsəlman cəmiyyətinin gündəlik yorğunluq yaşamasına səbəb olur – şübhə, dik baxışlar və məsafə saxlama artıq adi hala çevrilib və bu, həddindən artıq normallaşıb.
4326896
