Kəşmirdə 400 illik məscidin bərpası üçün büdcə ayrıldı
“İQNA”-nın “Kashmir Life” portalına istinadən verdiyi xəbərə görə, Kəşmir rəsmiləri 18-ci əsrə aid olan və Kəşmirin mərkəzində yerləşən Qandərbal bölgəsinin Malşahi Bağ ərazisindəki məscidin bərpası üçün vəsait ayırıb.
Yerə səfər edən yerli hökumət rəhbəri Ömər Abdullah bu məscidin bərpası üçün 5 kroun rupi dəyərində qoruma layihəsini təsdiqləyib.
Bu məscid Moğol imperatoru Şah Cahanın böyük oğlu Dara Şükuh tərəfindən onun mənəvi mürşidi Molla Şah Bədəxşi üçün inşa edilib. Bir zamanlar bölgənin mühüm dini mərkəzlərindən olan bu tikili, tarixi və memarlıq əhəmiyyətinə baxmayaraq, illər ərzində tədricən dağılmağa üz tutmuşdu.
Rəsmilər bildiriblər ki, bərpa layihəsinin məqsədi məscidi ilkin görünüşünə qaytarmaq və eyni zamanda onun ənənəvi memarlıq xüsusiyyətlərini dəqiqliklə qorumaqdır. İşlər mütəxəssislərin nəzarəti altında aparılacaq və əsas diqqət konstruksiyanın dayanıqlığının və tarixi orijinallığının qorunmasına yönələcək.
Bu xəbər yerli sakinlər tərəfindən böyük məmnuniyyətlə qarşılanıb və onlar bunu bölgənin irsinin qorunması istiqamətində mühüm addım kimi qiymətləndiriblər.
Qandərbalın Bihama sakini Muştak Mir bildirib ki, bərpa işlərinin tezliklə başlanacağı gözlənilir və ümid edir ki, məscid onilliklər əvvəlki orijinal görünüşünə qaytarılacaq.
Məscidin nəzarətçisi ƏbdürRəşid bu inkişafı icma üçün “rahatlıq gətirən bir an” kimi təsvir edib və deyib:
“Sevincimi gizlədə bilmirəm; bu, həqiqətən də müsbət addımdır. Bu tarixi məscidin bərpası üçün büdcənin təsdiqlənməsi yerli icmaya böyük rahatlıq və sevinc gətirib. İllərdir insanlar bu ibadət yerinin və yüz illik irsin öz əvvəlki əzəmətini itirməsindən narahat idilər. Bu addım onun dini, mədəni və tarixi əhəmiyyətinin gələcək nəsillər üçün qorunmasına kömək edəcək.”
Digər sakin Müddəssir Əhməd Mir isə bildirib ki, bu təşəbbüs təkcə fiziki bərpadan ibarət deyil, həm də gələcək nəsillər üçün ortaq mədəni və mənəvi irsin qorunmasına yönəlmiş bir səydir.
4351994
