Mga Muslim ang Nagtanim ng 10,000 na mga Punong Kahoy sa Kabisera ng Kenya bilang Pagpahayag ng Suporta sa Palestine
Nagtipon ang mga Muslim mula sa iba’t ibang mga bahagi ng Kenya noong Linggo sa Uhuru Park para sa isang malaking pagtatanim ng punong-kahoy na inorganisa ng grupong Mga Tinig para sa Palestine (Voices for Palestine). Ang kaganapan, na umabot din sa Central Park, ay idinaos bilang pagpapakita ng pagkakaisa sa mga mamamayang Palestino at bilang paggunita sa mahigit isang daang taon mula sa Balfour Declaration noong Nobyembre 2, 1917 — isang pangyayaring itinuturing ng marami bilang simula ng pagdurusa ng mga Palestino.
Nagtanim ang mga tagapag-ayos at mga kalahok ng 10,000 na mga punong kahoy bilang simbolo ng pag-alaala, paglaban, at muling pagbangon. Nilalayon ng mga punong ito na magsilbing buhay na alaala sa mga henerasyon ng mga Palestino na dumanas ng sapilitang paglisan, pananakop, at karahasan. Sinusuportahan din ng inisyatibong ito ang pambansang layunin ng Kenya na pataasin ang bilang ng mga kagubatan at maibalik ang berdeng pampublikong mga espasyo.
Sa kaniyang talumpati sa mga dumalo, sinabi ni Sheikh Badru Jaffar ng Jamia Moske Nairobi na ang pagtitipon ay kumakatawan sa parehong moral at pangkapaligirang pagkilos. Ipinaliwanag niya na ang pagtatanim ng puno ay hindi lamang tungkol sa konserbasyon kundi isang panawagan din para sa pandaigdigang katarungan at kapayapaan. “Higit pa ito sa simpleng pagtatanim ng mga puno; ito ay isang pandaigdigang panawagan para sa katarungan,” wika ni Sheikh Badru sa kanyang talumpati sa Uhuru Park.
Ayon sa mga tagapag-ayos, sinadya nilang piliin ang Nobyembre 2 upang ito ay tumapat sa anibersaryo ng Balfour Declaration. Sinabi nila na sa pamamagitan ng pagtatanim ng puno sa petsang ito, pinag-uugnay ng mga kalahok ang mga pagsisikap ng Kenya sa pangangalaga ng kapaligiran sa pandaigdigang pakikibaka para sa karapatang pantao. Layunin din ng kaganapan na mapataas ang kamalayan tungkol sa patuloy na krisis makatao sa Gaza Strip at iba pang mga bahagi ng teritoryo ng Palestine.
Marami sa mga dumalo ang may dalang mga watawat at mga plakard na nananawagan ng kapayapaan at katarungan, habang ang iba naman ay nag-alay ng panalangin para sa mga biktima ng patuloy na labanan. Mula Oktubre 2023, labis na tumindi ang karahasan sa Gaza. Ayon sa ulat ng UNICEF, hindi bababa sa 61,000 na mga bata ang napatay o nasugatan sa Gaza sa panahong ito — katumbas ng isang batang apektado tuwing labingpitong mga minuto. Marami sa kanila ang nagdusa ng trawma, naulila, o paulit-ulit na napilitang lumikas dahil sa mga pambobomba at mga operasyong militar.
Patuloy na nagpapahayag ng pagkabahala ang makataong mga organisasyon dahil sa lalong lumalalang mga kalagayan, kung saan may matinding kakulangan sa pagkain, gamot, at malinis na tubig. Ang pagkasira ng mga ospital, mga paaralan, at mga tirahan ay halos imposible nang mapunan at makapagpatuloy ng rehabilitasyon.
Ayon sa mga datos mula sa lokal at pandaigdigang mga ahensiya, mahigit 68,000 katao na ang napatay sa Gaza mula Oktubre 2023 dahil sa mga operasyong militar ng rehimeng Israel, at libo-libo pa ang nawawala sa ilalim ng mga guho ng nasirang mga gusali.
Naabot ang isang kasunduan sa tigil-putukan sa pagitan ng Israel at Hamas noong Oktubre 10 matapos ang mga pagsisikap ng negosasyon batay sa isang 20-puntong planong pangkapayapaan. Gayunman, paulit-ulit itong nilabag ng Israel, na nagdulot ng patuloy na pagkasawi at muling paglala ng labanan sa Gaza Strip. Ayon sa mga tagapag-ayos ng Mga Tinig para sa Palestine, layunin din ng kaganapan sa Uhuru Park na ipakita ang ugnayan ng hustisyang pangkapaligiran sa karapatang pantao. Binanggit nila na ang mga problemang ekolohikal gaya ng pagkalbo ng kagubatan at polusyon ay kadalasang pinakaapektado ang mga maralita at mga naninirahan sa lugar ng kaguluhan.
Ipinahayag ng mga kalahok ang kanilang pag-asang ang mga punong itinanim ay lalago bilang mga matibay na simbolo ng kapayapaan at katatagan. Marami sa kanila ang nagbigay-diin na ang katarungan para sa Palestine ay dapat manatiling pandaigdigang priyoridad, hindi lamang isang isyung rehiyonal o pampulitika.
Hinikayat ni Sheikh Badru at ng iba pang mga pinunong relihiyoso ang patuloy na pakikilahok ng komunidad ng mga Muslim sa Kenya at ng mas malawak na publiko sa mga gawaing pangkapayapaan at makataong proyekto. Hinimok nila ang mga mamamayan na makilahok sa mga inisyatibang pinagsasama ang pananampalataya at panlipunang responsibilidad.
