Ngayon, ang lalaking inakusahan ng pagsunog sa moske ay kinasuhan ng pananira sa isang ari-ariang panrelihiyon.

Sinasabing naghagis si Vincent Lang, 60, ng isang kagamitang panununog sa Northeast Philadelphia Islamic Center sa 1421 Tyson Ave. sa unang mga oras ng Hulyo 5. Nasunog ang moske at kumalat ang apoy sa paligid ng pasukang nakaharap sa kalsada ng gusali bago ito naapula ng mga bumbero. Walang natagpuang tao sa loob ang mga imbestigador at walang naiulat na nasugatan noong panahong iyon.

Nakuha ng mga kamera na pangseguridad ang bidyo ng isang taong nakasuot ng itim na panlamig na Nike na may talukbong habang lumalapit sa harapang balkonahe ng moske at naghahagis ng isang nagliliyab na bagay sa pasukan.

Kalaunan, nakilala ng mga ahente ng Kawanihan ng Alkohol, Tabako, Baril at mga Eksplosibo ang taong ito bilang si Lang batay sa impormasyong ibinigay ng isang hindi nagpakilalang pinagmulan.

Sinabi ng pinagmulan sa mga imbestigador na si Lang ay “hayagang nagpapahayag ng kanyang mga pananaw laban sa Islam at iba pang rasistang paniniwala, at napag-usapan na niya ang paggamit ng apoy upang sirain ang mga moske.” Ayon sa reklamong kriminal, isiniwalat din ng impormante na nagmamaneho si Lang ng isang itim na Hyundai Santa Fe na may mga mensaheng laban sa Islam na nakasulat sa mga bintana.

Natuklasan ng mga imbestigador na tumutugma sa paglalarawang ito ang isang sasakyang nakarehistro kay Lang. Ayon sa mga imbestigador, may sumulat ng “F--- Islam,” “F--- Allah,” at “Puting Pagmamalaki (White Pride)” sa likurang bintana at bintana sa panig ng pasahero.

Sa sumunod na pagsusuri sa mga rekord ng telepono ni Lang, sinasabing nasa lugar siya malapit sa moske bandang 1:29 ng madaling-araw noong Hulyo 5.

Iniugnay rin ng mga opisyal si Lang sa isang akawnt sa Facebook na nagpapahayag ng marahas na mga pananaw na Islamopobiko o laban sa mga Muslim.

Pinuri noong Huwebes ng sangay ng Philly ng Council on American-Islamic Relations sa Philadelphia ang pagsasampa ng kaso. Ang naturang organisasyon ay dati nang nag-alok ng gantimpalang $2,500 para sa impormasyong makatutulong sa kaso.

“Nagpapadala ang kasong ito ng mahalagang mensahe na ang mga pag-atake laban sa mga lugar ng pagsamba dahil sa kanilang pananampalataya ay hindi ordinaryong krimen. Ang mga ito ay mga pag-atake sa pangunahing karapatang sibil at kalayaan sa relihiyon ng buong mga komunidad,” sinabi ni Dr. Ahmet Tekelioglu, director ehekutibo ng CAIR-Philadelphia, sa isang pahayag.

“Nagpapasalamat kami sa Tanggapan ng US Attorney at pederal na tagapagpatupad ng batas sa pagkilala sa bigat ng mga paratang na ito sa pamamagitan ng pagdaragdag ng kasong may kaugnayan sa mga karapatang sibil. Ang bawat tao, anuman ang kanyang pananampalataya, ay may karapatang sumamba nang walang takot sa pananakot o karahasan.”

3498565