Pinarangalan ng Kagawarann ng Awqaf ng Ehipto ang Alaala ng Yumao na Qari na si Sheikh Hilal
Tinaguriang “Embahador ng Estado ng Pagbigkas,” si Sheikh Hilal ay isa sa dakilang mga personalidad sa larangan ng pagbigkas ng Banal na Quran sa Ehipto at sa buong mundong Islamiko, ayon sa pahayagang Al-Shorouk.
Ipinanganak si Hilal noong Mayo 29, 1945 sa rehiyon ng Damanhur Shubra Al-Khaimah sa lalawigan ng Qalyubia, Ehipto, at nag-iwan siya ng isang mayamang buhay na inialay sa paglilingkod sa Salita ng Pahayag ng Diyos.
Lumaki siya sa isang pamilyang may pagpapahalaga sa kaalaman at sa Banal na Quran, at kanyang naisapuso ang Aklat ng Diyos sa murang edad.
Natapos niya ang pagsasaulo ng buong Quran sa edad na 12. Pagkatapos nito, pinag-aralan ni Hilal ang mga agham ng Tajweed at pagbigkas sa ilalim ng ilang mga iskolar ng Quran. Isa sa kanyang pinakakilalang guro ay si Sheikh Muhammad Abdel Ghani, na gumabay sa kanya upang mag-aral sa Institusyon ng mga Pagbigkas ng Al-Azhar upang makumpleto ang kanyang panrelihiyon at Quranikong edukasyon.
Kitang-kita na ang kanyang talento sa pagbigkas mula pagkabata, at bago pa man siya umabot sa edad na 17, nakikilahok na siya sa mga pagtitipon para sa relihiyosong mga okasyon at mga gabi ng Quran hanggang sa kumalat ang kanyang katanyagan sa buong bansa.
Nakilala siya dahil sa kanyang malakas at kahanga-hangang tinig na naglagay sa kanya sa hanay ng dakilang mga qari ng Ehipto. Tinanggap din niya ang titulong “Embahador ng Estado ng Pagbigkas” dahil sa kanyang malawak na pagsisikap na ipalaganap ang Banal na Quran sa loob at labas ng Ehipto.
Natanggap si Sheikh Hilal sa pagsusulit ng Radyong Ehiptiyano noong 1976 matapos niyang mabuo ang sarili niyang natatanging istilo sa pagganap at pagbigkas.
Iginiit niyang magkaroon ng sariling paraan ng pagbigkas nang hindi ginagaya ang iba, kaya nag-iwan siya ng natatanging impresyon sa mga tagapakinig at mga mahilig sa pagbigkas ng Quran.
Naging kinatawan si Sheikh Hilal ng Ehipto sa maraming mga bansa sa mundo. Naglakbay siya sa mahigit 20 na mga bansang Arabo, Uropiano, Aprikano, at Amerikano at bumigkas ng Quran sa maraming malalaking mga pagtitipong Islamiko. Naitala rin niya ang buong Banal na Quran nang dalawang beses sa Estados Unidos at Switzerland, at may ilang kalalakihan at kababaihan na yumakap sa Islam matapos maantig sa pakikinig sa kanyang pagbigkas ng Banal na Quran.
Hinawakan ni Sheikh Hilal ang posisyon bilang pinuno ng mga mambabasa ng Quran sa lalawigan ng Qalyubiyah sa loob ng maraming mga taon at nakilala sa kanyang dedikasyon sa paggabay at pagtuturo sa mga qari, gayundin sa kanyang pagbibigay-diin sa wastong pagsunod sa mga alituntunin ng pagbigkas. Ipinagpatuloy niya ang kanyang misyon sa paglilingkod sa Salita ng Pahayag hanggang sa kanyang pagpanaw noong Hulyo 18, 2013, at nag-iwan ng walang hanggang pamana sa larangan ng Quran.
