Pagmamahal sa Quran: Isang Hindi Nakapag-aral na Babaeng Taga-Yaman ang Nagsaulo ng Quran
IQNA – Ang pagsasaulo ng buong Quran sa pamamagitan ng mga cassette tape ay lubos na nakaantig sa pamilya ni Hajiya Maryam, 82 taong gulang.
Ang kanyang 21 na mga anak at mga apo, na marami ay nagtapos sa unibersidad, ay namangha at nagpugay sa kahanga-hangang nagawa ng kanilang lola na hindi marunong bumasa at sumulat, sapagkat nakamit niya ang isang bagay na hindi nagagawa ng maraming nakapag-aral na tao.
Ayon sa ulat ng Al-Mushahid, si Hajiya Maryam Al-Rumaymah ay nananatiling matalas ang pag-iisip sa kabila ng pagiging mahigit 82 taong gulang at pagkakaroon ng mahinang katawan na nakaranas ng mga dekada ng paghihirap at pagsubok. Payapa ang kanyang mukha habang nakahiga sa kanyang higaan dahil sa karamdaman, na nagpapakita na ang matibay na kalooban ay kayang manaig laban sa pinakamahihirap na mga hamon.
Habang malinaw na nakaukit sa alaala ng kanyang nag-iisang anak na lalaki at tatlong anak na mga babae ang mga detalye ng kanyang pagiging ina, iba naman ang pagtingin sa kanya ng kanyang 21 na mga apo.
Ang kanilang larawan ng kanilang lola ay hindi maihihiwalay sa dalawang mga tagpo: una, isang lola na may hawak na tape recorder at buong atensiyong nakikinig sa mga talata ng Banal na Quran na binibigkas ni Fares Ebad; at ikalawa, siya mismo na binibigkas ang mga talatang iyon nang may husay at katumpakan.
Napagtagumpayan ng babaeng ito mula sa kanayunan ang kanyang kawalan ng kakayahang bumasa at sumulat at naisulo ang buong Quran sa pamamagitan lamang ng pakikinig.
Itinatag ng kanyang anak na si Sheikh Mukhtar ang isang sentro para sa pagsasaulo ng Quran sa kanilang nayon, na naging pinakamalaking inspirasyon ng kanyang ina. Noong 2006, nang siya ay nasa edad sisenta, nagpasiya siyang gawing realidad ang kanyang matagal nang pangarap.
Tagumpay Matapos ang 10 Taon ng Paglalakbay Kasama ang Quran
Sampung mahabang mga taon ang ginugol ni Hajiya Maryam kasama ang Banal na Quran, at dumating ang makasaysayang sandaling iyon noong 2016, isang sandaling bunga ng mga dekada ng kawalan ng kakayahang bumasa at sumulat at sampung mga taon ng araw-araw na pakikinig at pagsisikap.
Nang bigkasin niya ang huling talata, pumatak ang mga luha ng kagalakan sa kanyang pagod na mga pisngi, at siya ay nagpatirapa nang matagal bilang pasasalamat, punung-puno ng pagmamalaki at pakiramdam ng tagumpay laban sa mga limitasyon ng kanyang katawan.
