Sloveniyada Qurani-Kərim və Hədis üzrə 9-cu müsabiqə başa çatdı
“İQNA”-nın Qətərin “qna.org.qa” xəbər agentliyinə istinadla verdiyi xəbərə görə, müxtəlif yaş qruplarından olan minə yaxın oğlan və qız Quran öyrənəninin geniş iştirakı ilə Sloveniyada keçirilən “Quran nəsli” adlı 9-cu müsabiqənin fəaliyyəti bağlanış mərasimi və qaliblərin mükafatlandırılması ilə ölkənin paytaxtı Lyublyanada başa çatdı.
Bu müsabiqələr Sloveniya İslam cəmiyyətinin ən mühüm illik fəaliyyətlərindən biridir və bağlanış mərasimi Lyublyana İslam Mədəniyyət Mərkəzində keçirilib.
Yarışmalar Qətər Vəqflər və İslam İşləri Nazirliyinə bağlı olan və 2015-ci ildən etibarən bu müsabiqələrin təşkilatçısı olan “Şeyx Casim bin Məhəmməd Sani” Quran müsabiqələrinin rəhbərliyi və dəstəyi ilə keçirildi. Müsabiqənin təşkili və bağlanış mərasimində Qətərdən rəsmi heyət də iştirak edib.
Sloveniya İslam Şeyxliyi (Müsəlmanların İdarə Heyəti) hər il bu müsabiqələrə nəzarət edir və ölkənin müxtəlif şəhər və bölgələrindəki 18 Quran tədris mərkəzi bu tədbirdə iştirak edir.
Yarış iştirakçıları hər həftə Qurani-Kərimin hifzi və məna dərslərində iştirak edir, onlara İslam etiqadı, Peyğəmbərimizin (s) həyatı və İslam əxlaqı barədə dərslər keçirilir. Bu dərslər çoxmədəniyyətli bir cəmiyyətdə İslam kimliyini gücləndirmək və dini-mənəvi immuniteti artırmaq məqsədi daşıyır.
Bu yarışmanın 9-cu dövrəsi “Quranda və Sünnədə Müsəlmanın Əxlaqı” mövzusu ilə keçirildi və müsabiqəyə səkkiz qrup qatıldı. Bu bölmələrə Peyğəmbərin (s) həyatı, səhabələrin həyatı, İslamın əsasları, İslam əqidəsi, müsəlmanın əxlaqı, “Qariə” surəsindən “Nas” surəsinə qədər və “Zuha” surəsindən “Nas” surəsinə qədər hifz daxildir.
Bağlanış mərasimi fərdi və qrup halında Quran tilavəti, ərəb və bosniya dillərində ilahilər və dini nəğmələr, uşaqlar üçün xüsusi müsabiqələrlə müşayiət olunub.
Mərasimdə 50-dən çox qalibə pul mükafatları, Quran nüsxələri və təqdirnamələr təqdim olunub, həmçinin Quran müəllimləri və müsabiqə nəzarətçiləri də təltif ediliblər.
4291970
