“İQNA”-nın "Əl-Cəzirə"yə istinadən verdiyi məlumata görə, hicablı bir müəllimənin uşaqlara beş vaxt namazın qılınması haqqında ingilis dilində interaktiv bir mahnı öyrətdiyini göstərən videonun yayılmasından sonra, sosial şəbəkələrdə müsəlmanların mövcudluğu və təhsil fəaliyyətlərinə qarşı təhrikedici reaksiyalar dalğası yaranıb.

Sosial platformalardakı bəzi hesablar bu videodan istifadə edərək, İngiltərənin dövlət məktəblərindən birində müsəlman müəllimlərin xristian uşaqların beynini yuduğunu iddia edən bir povest təbliğ edib və valideynləri, eləcə də rəsmiləri uşaqları "ekstremizmdən" xilas etmək üçün təcili müdaxilə etməyə çağırıblar.

Videoda hicablı bir müəllimə sinifdə məktəbli forması geyinmiş uşaqların qarşısında əyləşib və uşaqlar həvəslə namazla bağlı mövzuları ondan sonra təkrar edirlər: O, uşaqlardan soruşur: "Biz neçə dəfə namaz qılırıq?" və onlar cavab verirlər: "Gündə beş dəfə". Sonra müəllimə onlardan soruşur: "Bunlar hansılardır?" və onlar beş gündəlik namazın adlarını bir-bir sadalayırlar. Video uşaqların dua üçün əllərini qaldırıb "Allaha şükür" demələri ilə başa çatır.

Facebook və TikTok-dakı bəzi hesablar (o cümlədən özlərini xəbər mediası kimi təqdim edənlər) videonun bir "İngilis məktəbində" çəkildiyini və müsəlman müəllimənin "qeyri-müsəlman ağdərili uşaqlara beş vaxt namazı öyrətdiyini" iddia edən bir povesti təbliğ ediblər.

Bu halda, videonun mənbəyi araşdırıldıqda məlum olur ki, o, ilk dəfə 8 aprel 2026-cı ildə Instagram-da "Kiçik ağıllı müsəlmanlar" adlı bir hesab tərəfindən yayımlanıb və Avstraliyanın Yeni Cənubi Uels ştatında yerləşən özəl bir təhsil mərkəzinə aiddir.

Bu faktlar təsdiq edir ki, videodakı uşaqlar ingilisdilli dövlət məktəbində valideynlərinin xəbəri olmadan "gizli" şəkildə dini təlim alan şagirdlər deyil, özəl İslam təhsil mərkəzində qeydiyyatdan keçmiş müsəlman uşaqlardır.

4370141