“İQNA”-nın Anadolu Agentliyinə istinadən verdiyi məlumata görə, 11-ci İstanbul Beynəlxalq Ərəb Kitab Sərgisi şənbə günü, avqustun 16-da işə başlayıb və "Hekayə davam edir" şüarı ilə avqustun 23-dək davam edəcək. Sərgi Anadolu Agentliyinin media dəstəyi ilə keçirilir.
Sərginin ilk günündə bir qrup İslam dünyası alimi Dünya Qurani-Kərim Forumunun fəaliyyətə başladığını elan edib.
Forumun təsisçi heyəti tərəfindən xüsusi iclasda yayımlanan bəyanatda deyilir: "Bu gün biz Dünya Qurani-Kərim Forumunun işə düşdüyünü və dünyanın hər yerindəki qurumlar, mərkəzlər, tilavət məclisləri və Quran akademiyaları üçün qeydiyyat platformasının açıldığını elan edirik".
Bəyanatda qeyd olunur ki, bu forumun yaradılmasının İstanbuldan elan edilməsi institusional Quran fəaliyyətləri tarixində həlledici bir məqamdır və bu ideya "Əl-Əqsa məscidinin həyəti və Qüds"dən qaynaqlanıb.
Bəyanatda əlavə edilir: "Bu ideya sadə və dərin bir sualla başladı: Dünyadakı Quran əhli bir-birini tanısa nə olardı? Hamısı eyni kitaba xidmət edən və eyni mesajı daşıyan, lakin çox vaxt bir-birindən xəbərsiz olan minlərlə qurum görüşsəydi, nə baş verərdi? Pərakəndə təcrübələr ortaq bir gücə, fərdi təşəbbüslər qlobal layihələrə və ayrı-ayrı qüvvələr Allahın kitabına xidmət etmək üçün harmonik şəkildə çalışan vahid şəbəkəyə çevrilsəydi, nə olardı?".
Bəyanatın davamında qeyd olunur ki, bu ideya alimlərə, qarilərə və qurumlara təqdim edildikdə böyük rəğbətlə qarşılanıb. Dünya Qurani-Kərim Forumu "super qurum" kimi xidmət etmək, rəqib və ya əvəzedici olmaq üçün deyil, qlobal bir çətir kimi təsis edilib. Məqsəd Quran qurumlarına xidmət etmək, onları gücləndirmək, müstəqilliklərini və unikal kimliklərini qorumaq, əməkdaşlıq və tərəfdaşlıq üçün qapılar açmaqdır.
Forumun təsisçi heyəti dünyanın müxtəlif ölkələrindən olan bir qrup görkəmli alim, qari və akademiklərdir. Misirdən Əhməd İsa əl-Məsaravi forumun sədri, Qətərdən Əbdürrəşid Sufi sədr müavini, İordaniyadan Əhməd Şükri Şabsuğ isə katibi təyin edilib.
Həmçinin Əbdüssalam Məcidi (Yəmən), Məhəmməd Əmin Məşəli (Türkiyə), Qanem Qədduri əl-Həməd (İraq), Kamal Qədə (Əlcəzair), Əhməd Miyan ət-Təhanəvi (Pakistan), Xeyrəddin Xoca (Kosovo), Əbdürrəhman əl-Cəməl (Fələstin), Məhəmməd Aydın (Türkiyə), Məhəmməd Zeytun Rasmin (İndoneziya), Yəhya əl-Ğəsani (Suriya), Əbdülfəttah əl-Fərisi (Mərakeş), Məhəmməd əl-Həsən Busu (Seneqal), Hişam Əbdülbari ər-Racih (Malayziya), Mustafa Əhməd Ərəfə (Küveyt), Həsən Məhəmməd Saleh (ABŞ) və Əhməd əs-Sənami (İtaliya) kimi Quran tədqiqatçıları bu Quran forumunun üzvləridir.
4370010
