Suriyalı və israilli rəsmilərin Bakıda keçirdiyi görüşdə nə baş verdi?
“Rusya Əl-Yəvm” xəbər agentliyinin verdiyi məlumata görə, ivrit dilli “Kan” kanalı İsrail və Suriya rəsmilərinin Azərbaycanda apardığı danışıqların detalları barədə məlumat yayıb.
Bu kanal bildirib ki, görüşdə Suriya və İsrail rəsmiləri Dəməşqin Cənubi Suriyadan İsrail qüvvələrinin çıxarılması ilə bağlı tələbini müzakirə ediblər.
Görüşdə həmçinin İsrail rəsmiləri ilə Suriya rəsmiləri arasında Təl-Əviv və Dəməşq arasında müəyyən koordinasiya məsələləri ətrafında fikir mübadiləsi aparılıb.
“Kan” əlavə edib ki, gələn bazar ertəsi Brüsseldə, Avropa İttifaqının qərargahında İsrailin xarici işlər naziri Gideon Saar ilə Suriyanın xarici işlər naziri Əsəd əş-Şeybani arasında görüşün keçirilməsi gözlənilir, lakin hələlik bu iki diplomatik şəxs arasında ayrıca görüşün vaxtı dəqiqləşdirilməyib.
Digər tərəfdən, Suriyanın “Əl-Vətən” qəzeti vurğulayıb ki, Suriyanın keçid dövrü rəhbəri Əhməd əş-Şərə İsrail heyəti ilə keçirilən heç bir görüşdə iştirak etməyib.
“Əl-Vətən” qeyd edib ki, bu kanalların açıqladığı məqsəd Təl-Əvivin 1974-cü il razılaşmasına sadiq qalmasıdır və nə İsraillə normallaşma, nə də sülh sazişi gündəmdədir, bu məsələlər üçün hələ tezdir. Azərbaycanın siyasi səyləri də münasibətlərin normallaşdırılmasına deyil, vəziyyətin sakitləşdirilməsinə yönəlmiş strategiyanın bir hissəsidir.
Qəzet əlavə edib: “Azərbaycan bu gün həm İsraillə güclü əlaqələrə, həm də Türkiyə ilə siyasi koordinasiyaya malik çevik bir diplomatik meydan kimi çıxış edir. Bu da Bakını istənilən dolayı anlaşmalar üçün potensial tranzit mərkəzinə çevirir”.
Digər tərəfdən, İsrailin i24 kanalı isə bildirib ki, Suriyanın müvəqqəti prezidenti Əhməd əş-Şərə azı bir görüşdə İsrail rəsmiləri ilə Azərbaycanda iştirak edib, baxmayaraq ki, Dəməşqdəki mənbələr onun həmin görüşdə iştirak etdiyini inkar edirlər.
Sayt əlavə edib ki, bu görüşdə İsrailin Dəməşqdə diplomatik statusu olmayan bir koordinasiya ofisi açması ehtimalı da müzakirə olunub. Saytın yazdığına görə, İsrail və ABŞ-ın bu görüşləri məhz Azərbaycanda keçirmək qərarı, İrana mesaj göndərmək məqsədi daşıyır.
4294076
