Lester şəhərində müsəlman qadın polis əməkdaşları üçün xüsusi hicab dizayn edildi
“İQNA”-nın “ITV News” kanalına istinadla verdiyi xəbərə görə, İngiltərənin Lesterşir polisi qadın müsəlman zabitlər üçün xüsusi hicab istehsalına De Montfort Universiteti ilə əməkdaşlıq çərçivəsində başlayıb.
Bu hicab elə dizayn olunub ki, qarşıdurma zamanı dartılarsa, alt hissəsi ayrılaraq təhlükəsizliyi təmin etsin. Dizayn prosesi, rahatlıq və praktikliyi təmin etmək üçün xidmətdə olan müsəlman zabitlərlə məsləhətləşmələri də əhatə edib.
Lesterşir polisi bildirib ki, bu layihə digər xidmət sahələrinin də diqqətini çəkib və gələcəkdə özəl sektorda da istifadə oluna bilər.
Bu ideya ilk dəfə 20 ildən çox əvvəl şəhərin polis qüvvələrindən Yasin Desai tərəfindən irəli sürülmüşdü. Beynəlxalq modellərin araşdırılmasından sonra Desai 2022-ci ildə De Montfort Universiteti ilə əməkdaşlıq edərək ön cəbhə vəzifələrinə uyğun hicab hazırladı.
O deyib: “Əslində bu layihənin düzgün şəkildə tamamlanması illər çəkdi. Biz qadın zabitlər üzərində döyüş sınaqları apardıq. Alt hissəsi ayrılabiləndir və zabitlər hər şəraitdə hicablarını qoruya bilirlər.”
Desai əlavə edib: “Üç illik araşdırma və inkişafdan sonra bu dizaynı düzgün şəkildə həyata keçirməyimiz heyrətamizdir. Biz bunu birlikdə irəli aparırıq. Bu, əla məhsuldur, təhlükəsizdir və müsəlman qadınların ləyaqətini qoruyur.”
Yeni polis əməkdaşları, o cümlədən Hafsa Aba-Qana və Səhr Nas bu təşəbbüsü alqışladılar. Aba-Qana, polis komandirlərindən biri, dedi ki, bu layihə zabitlərə dini inanclarını qorumağın peşəkar vəzifə ilə yanaşı mümkün olduğunu göstərir və bu, xüsusilə yeni qoşulanlar üçün böyük əhəmiyyət daşıyır.
Müsəlman polis əməkdaşlarından Marina Vaka isə əlavə edib: “Bu hicab rahat və təhlükəsizdir, həmçinin gözəl və peşəkar görünür. Biz ümid edirik ki, bu, daha çox müsəlman qadını polisə qoşulmağa həvəsləndirəcək.”
4320946
