Suriyada İmam Əli (ə) məscidinə intihar hücumu: 6 şəhid və 21 yaralı
“İQNA”-nın verdiyi məlumata görə, Suriya rəsmi xəbər agentliyi SANA yazır ki, “İmam Əli ibn Əbi Talib (ə)” məscidinə qarşı həyata keçirilən terror hücumu nəticəsində bir neçə nəfər həyatını itirib, bir çoxu isə yaralanıb.
Suriya Səhiyyə Nazirliyinin Təcili Yardım və Fövqəladə Hallar İdarəsinin rəhbəri Nəcib ən-Nəssan bildirib: “İlkin məlumatlara görə, partlayışda 6 nəfər şəhid olub, 21 nəfər yaralanıb”.
Təhlükəsizlik mənbəsi açıqlayıb ki, ilkin araşdırmalar partlayışın məscidin daxilində yerləşdirilmiş bombalardan qaynaqlandığını göstərir.
Dərhal daxili təhlükəsizlik qüvvələri hadisə yerinə göndərilib və məscidin ətrafında təhlükəsizlik kəməri yaradılıb. Səlahiyyətli orqanlar cinayətkarların təqibi üçün araşdırma və sübutların toplanmasına başlayıblar.
Mülki müdafiə qrupları isə yaralıların xilas edilməsi, cəsədlərin çıxarılması və dağıntıların təmizlənməsi üçün sürətlə hərəkətə keçiblər.
Partlayışdan sağ qalanlardan biri açıqlayıb ki, hücumçu “Allahu Əkbər” qışqıraraq məscidə daxil olub və sonra özünü partladıb.
4325118
