"And içirəm" (I swear) filmi, məşəqqətlərin içindən həqiqəti axtarmaq və oyanış
2025-ci il Britaniya istehsalı olan "And içirəm" filmi, illərlə Turet sindromu (Tourette Syndrome) ilə yaşamış və sonradan bu sahədə ən tanınmış maarifləndirmə fəallarından birinə çevrilmiş Con Devidsonun (John Davidson) real həyatına əsaslanan bir bioqrafik dramdır.
Filmin rejissoru Kirk Cons, baş rolun ifaçısı isə Robert Aramayodur.
Turet sindromu, iradəsiz motor və səs tikləri ilə xarakterizə olunan nevroloji-inkişaf pozğunluğudur. Bu tiklər adətən uşaqlıq dövründə başlayır və zaman keçdikcə şiddəti dəyişə bilir.
Hekayənin baş qəhrəmanı Con Devidson xəstəliyin əlamətləri ilə qarşılaşdığı andan etibarən, xəstəliyin fiziki əzabından çox, "Niyə məhz mən?" sualı ilə zehni mübarizə aparır. O, daim beynində "Dünyada bu xəstəliyə və əzaba layiq olan o qədər cinayətkar və günahkar varkən, niyə mənim başıma bu gəldi?" deyə düşünürdü.
Xəstəliyi dərk etmək və qəbul etmək üçün ailənin və qayğıkeş himayədarın rolu çox vacibdir. Conun xəstəlik əlamətləri aşkarlandıqda, atası bu həqiqəti və məsuliyyəti qəbul etməyərək ailəni tərk edir. Anası da övladının xəstəliyini qəbul etməyə çalışsa da, dəstək rolunu lazımınca yerinə yetirə bilmir.
Lakin Con film boyu keçmiş sinif yoldaşının psixi sağlamlıq üzrə tibb bacısı olan anasının köməyi ilə dərk olunur, şəxsiyyət kimi böyüyür, daxili dünyasını kəşf edir və zehni suallarının cavabını tapır.
Həmin illərdə Turet sindromu çox tanınmış və yayılmış bir xəstəlik deyildi və insanların bu barədə kifayət qədər məlumatı yox idi. Con tədricən öz yolunu və xəritəsini tapdı; o, missiyasının bu xəstəlikdən əziyyət çəkən həmnövlərinə kömək etmək olduğunu anladı.
O, təhsil, xəstələrə dəstək və bu xəstəliklə bağlı cəmiyyətdəki damğalarla mübarizə sahəsində çox fəal çalışdı; hətta 2019-cu ildə Britaniya kraliçasından göstərdiyi xidmətlərə görə "OBE" (Britaniya İmperiyasının Ordeni) fəxri nişanını aldı.
Acılıq və ümid arasında tarazlıq
Film ayrı-seçkiliyə, ictimai yanlış anlaşılmalara və xəstəliyin yaratdığı əzablara toxunsa da, həddindən artıq sentimentalizm tələsinə düşmür. Onun üslubu bir çox məqamlarda isti və ümidvericidir; baş qəhrəmanın inkişaf yolunu ruhlandırıcı şəkildə təqdim edir.
Film sadəcə bir xəstəlik haqqında olmaqdan çox, insan ləyaqəti, fərqlilikləri qəbul etmək, cahilcə mühakimələrlə mübarizə aparmaq, məhdudiyyəti fürsətə və mənəvi yüksəlişə çevirmək haqqındadır.
4358638
