İmam Hüseyn (ə) müqəddəs ziyarətgahının Ərbəin zəvvarları üçün Quran proqramları
"Kərbəla Əl-An" xəbər agentliyinə istinadən "İQNA"-nın məlumatına görə, İmam Hüseyn (ə) müqəddəs ziyarətgahına bağlı "Darul-Quranil-Kərim" mərkəzi müqəddəs Kərbəla şəhərinə aparan yollar boyunca onlarla Quran stansiyası yaratmaqla özünün Quran təbliği və təlimi layihəsinə başlayıb. Bu proqram Ərbəin mərasimini qeyd etmək üçün hərəkət edən zəvvarlarla paralel olaraq, Quran mədəniyyətini yaymaq və dini maarifləndirməni artırmaq məqsədilə həyata keçirilir.
"Darul-Quranil-Kərim" mərkəzindən Əmad əl-Vəcidi çıxışında bildirib: "Bu layihə Quranın prinsiplərini möhkəmləndirməyə və Ərbəin zəvvarlarının Kərbəlaya səfərləri zamanı İslamın təlimləri ilə bağlılıqlarını gücləndirməyə kömək edən təlim və maarifləndirici proqramlarla onlarla Quran stansiyasının yaradılmasını əhatə edir".
O, qeyd edib ki, bu proqramlar Quran mədəniyyətini yaymaq, dini təlimlər haqqında məlumatlılığı artırmaq və bu böyük ziyarətin mühitinə uyğun şəkildə dini göstərişlər vermək məqsədi daşıyır.
Digər tərəfdən, "Darul-Quranil-Kərim" mərkəzinin rəsmilərindən olan Seyid Xalid əl-Ğalibi izah edib ki, Quran stansiyaları zəvvarlar arasında dini maarifləndirməni artırmaq, əqidəvi izahatlar vermək və fiqhi sualları cavablandırmaq məqsədilə yaradılıb. Bu addım düzgün İslami anlayışların möhkəmlənməsində və İmam Hüseyn (ə) zəvvarlarına xidmətdə rol oynayır.
4366344
