انڈیا؛ وقف قانون میں تبدیلی کے خلاف مظاہرے پر تشدد
ایکنا نیوز- الجزیرہ نیوز کے مطابق، بھارت کی جنوبی ریاست کیرالہ میں مظاہرین، یکجہتی کی تحریکوں کے کارکنان اور اسلامی طلبہ تنظیم کے ارکان اس وقت پولیس کی جانب سے لاٹھی چارج اور واٹر کینن کے ذریعے تشدد کا نشانہ بنے جب وہ مسلمانوں کے اوقاف کے قانون میں متنازعہ اصلاحات کے خلاف احتجاج کرتے ہوئے کالی کٹ انٹرنیشنل ایئرپورٹ کی طرف مارچ کر رہے تھے۔
پولیس نے مظاہرین کو روکنے کے لیے رکاوٹیں کھڑی کیں اور جب مظاہرین نے نعرہ لگایا کہ وقف کا قانون نسل کشی کی ایک علامت ہے، تو پولیس نے ان پر تشدد شروع کر دیا۔
پولیس کے حملوں میں متعدد مظاہرین زخمی ہوئے اور پولیس نے دونوں تنظیموں کے کئی رہنماؤں کو اس وقت گرفتار کر لیا جب مظاہرین سڑک بند کر رہے تھے۔
اسلامی طلبہ تنظیم نے ایک بیان میں پولیس کے اقدامات کی مذمت کرتے ہوئے اسے بھارت کی کمیونسٹ پارٹی کی زیر قیادت ریاستی حکومت کی "منافقت" قرار دیا۔
بیان میں کہا گیا ہے: "ہم وقف قانون میں اصلاحات کے خلاف احتجاج کرنے والے مظاہرین پر وحشیانہ تشدد، آنسو گیس اور واٹر کینن کے استعمال کی شدید مذمت کرتے ہیں۔ کمیونسٹ پارٹی کی حکومت اور سیکیورٹی اداروں نے اپنی کھلی منافقت ظاہر کر دی ہے۔"
اس سے قبل بھی اسلامی طلبہ تنظیم نے وقف قانون میں مجوزہ اصلاحات کو مسترد کرتے ہوئے اسے بھارتی حکومت کی جانب سے مسلمانوں کے مذہبی اور فلاحی اداروں پر حملہ قرار دیا تھا۔/
4276037
