عمرہ زائرین کی سہولت کے لیے سعودی حکومت کی جانب سے جدید اقدامات کا آغاز

ایکنا: سعودی عرب نے مکہ مکرمہ اور مدینہ منورہ میں عمرہ زائرین کی فلاح و بہبود کو بہتر بنانے کے لیے کئی جدید منصوبے متعارف کروائے ہیں۔

ایکنا نیوز- نیوز ایجنسی Gbusiness کے مطابق ان اقدامات میں ڈیجیٹل ایجادات، حفاظتی اقدامات میں بہتری، اور بنیادی ڈھانچے کی ترقی شامل ہے۔

1. ایپلیکیشن "رُشد" (Rushd)

وزارتِ امور اسلامی نے عمرہ مفردہ 1447ھ کے آغاز پر مدینہ میں ایک آگاہی مہم کا آغاز کیا ہے تاکہ زائرین کو "رُشد" ایپلیکیشن سے فائدہ اٹھانے کی ترغیب دی جا سکے۔

یہ ایپ درج ذیل سہولیات فراہم کرتی ہے:

·       الیکٹرانک قرآن

·       مکہ کے مطابق نماز کے اوقات

·       قبلہ کا رخ

·       حج و عمرہ کی تربیت کے لیے کثیر لسانی تھری ڈی ورچوئل گائیڈ

·       اسلامی ای-لائبریری

·       "صحیح الاستشهاد" ویب سائٹ تک رسائی

یہ ایپ مدینہ کے اہم مقامات، جیسے تاریخی مساجد اور مسجد نبویؐ کے قرب و جوار میں فعال ہے، تاکہ زائرین اپنے روحانی سفر کو بہتر بنا سکیں۔

2. سمارٹ حفاظتی کنگن

مسجد الحرام اور مسجد نبویؐ کی جنرل پریذیڈنسی نے کمزور طبقات (مثلاً بچے، بزرگ اور کم بینا افراد) کے لیے سمارٹ سیفٹی بریسلیٹس متعارف کرائے ہیں۔ یہ کنگن ہنگامی رابطے کی معلومات محفوظ کرتے ہیں اور ضرورت پڑنے پر فوری مدد ممکن بناتے ہیں۔

یہ اقدام 24 گھنٹے یکساں خدمات کی فراہمی کو یقینی بنانے کی بڑی کوششوں کا حصہ ہے، تاکہ ہر زائر کو امن و سکون فراہم کیا جا سکے۔

3. مدینہ میں بنیادی ڈھانچے کی بہتری

مدینہ ریجن ڈویلپمنٹ اتھارٹی نے 2024ء میں "زائرین کے تجربے" کی بہتری کے لیے 16 منصوبے نافذ کیے ہیں، جن کا مقصد بنیادی ڈھانچے، تربیت، ہجوم کے انتظام، اور مصنوعی ذہانت پر مبنی ٹیکنالوجی کا استعمال ہے۔ یہ تمام اقدامات مسجد نبویؐ اور تاریخی مقامات پر زیارت کو آسان اور بامقصد بنانے کے لیے ہیں۔

4. غیر قانونی مراکز کی بندش

وزارتِ سیاحت نے جولائی 2025ء میں مکہ میں معائنہ کے بعد 25 غیر مجاز ہوٹل اور قیام گاہیں بند کر دیں۔ ان پر بغیر اجازت کام کرنے، کم معیار کی خدمات اور حفاظتی خدشات جیسے الزامات تھے۔ یہ قدم اس بات کو یقینی بنانے کے لیے ہے کہ تمام سیاحتی سہولیات ضوابط کے مطابق ہوں اور زائرین کی توقعات پر پورا اتریں۔

وزارت نے "ہمارے مہمان ہماری ترجیح" کے عنوان سے مہم بھی شروع کی ہے، جو زائرین کو ترغیب دیتی ہے کہ وہ 930 مربوط سیاحتی مراکز سے معیاری خدمات حاصل کریں۔

5. مدینہ میں نئی سروس سینٹرز

2024ء میں مسجد نبویؐ کے صحنوں میں قائم کیے گئے دو سروس سینٹرز نے تقریباً 1,88,000 زائرین کو خدمات فراہم کیں۔ یہ مراکز کثیر لسانی رہنمائی، معذور افراد کے لیے سہولیات، معلوماتی مواد، اور بچوں و بزرگوں کے لیے حفاظتی کنگن فراہم کرتے ہیں تاکہ وہ مسجد میں آسانی سے رہنمائی اور مدد حاصل کر سکیں۔

یہ تمام اقدامات  جن میں ڈیجیٹل ایجادات، حفاظتی بہتری، ضابطوں کا نفاذ اور انفراسٹرکچر کی ترقی شامل ہیں  مسجد الحرام اور مسجد نبویؐ میں زائرین کو زیادہ محفوظ، باوقار اور سہل تجربہ فراہم کرنے کے لیے سعودی عرب کی مربوط کوششوں کا حصہ ہیں۔/

4297277