تھائی لینڈ میں قرآنی پروگرام «مهر قرآن» کی پذیرائی
ایکنا نیوزکی رپورٹ کے مطابق، اس منصوبے کا مرکزی محور ماہِ مبارک رمضان کے دوران روزانہ قرآنِ کریم کی جزء خوانی کا انعقاد ہے۔ ہر روز قرآن کا ایک پارہ صحیح اور رواں تلاوت کے ساتھ پیش کیا جاتا ہے، اور اسی کے ساتھ آیات کا ترجمہ، مفہومی نکات، اخلاقی پیغامات اور ان کی تربیتی و عملی جہات بھی بیان کی جاتی ہیں، جو مخاطبین کی انفرادی اور اجتماعی زندگی کی ضروریات سے ہم آہنگ ہوتی ہیں۔
ان نشستوں کا مواد محترمہ میرزائی سادہ اور قابلِ فہم زبان میں ترتیب دیتی ہیں، تاکہ مختلف عمر کے افراد، متنوع تعلیمی سطح رکھنے والے افراد اور غیر ایرانی شائقین بھی اس سے بھرپور استفادہ کر سکیں۔
موصولہ رپورٹس اور دستیاب اعداد و شمار کے مطابق، اس پروگرام کو طلبہ، اساتذہ، خواتین، طلبۂ علومِ دینیہ، ثقافتی کارکنان اور معارفِ اسلامی سے دلچسپی رکھنے والے افراد کی جانب سے بھرپور پذیرائی حاصل ہوئی ہے۔ شرکاء کی مسلسل شرکت، روزانہ پروگرام کی پیروی اور تاثرات و تشکر کے پیغامات اس بات کی نشاندہی کرتے ہیں کہ یہ منصوبہ ایک مشترکہ روحانی فضا قائم کرنے اور قرآنِ کریم سے تعلق مضبوط بنانے میں مؤثر ثابت ہوا ہے۔
اس منصوبے کی نمایاں خصوصیت مجازی فضا سے دانشمندانہ استفادہ کرتے ہوئے ایک ہمہ گیر، مسلسل اور جغرافیائی حدود سے بالاتر قرآنی محفل کا قیام ہے۔ «مہر قرآن» پلیٹ فارم پر رمضان المبارک کے قرآنی پروگرام، خصوصاً روزانہ جزء خوانی، اس دور کی نمایاں اور مؤثر ثقافتی و دینی سرگرمیوں میں شمار ہونے لگے ہیں۔
4337435
