تاجیکی اور ویتنامی آڈیو ترجمہ قرآن مدینہ میں تیار
ایکنا نیوز- الیوم نیوز کے حوالے سے بتایا گیا ہے کہ شاہ فہد قرآنِ کریم پرنٹنگ کمپلیکس نے قرآنِ کریم کی خدمت اور جدید ٹیکنالوجی سے استفادہ کرتے ہوئے مختلف زبانیں بولنے والے مسلمانوں کے لیے قرآن کے فہم کو آسان بنانے کی اپنی کاوشوں کے تحت معانیِ قرآن کا صوتی ترجمہ ویتنامی اور تاجک زبانوں میں متعارف کرایا ہے۔
کمپلیکس کے مطابق اس نئی سہولت کے ذریعے صارفین ان دونوں زبانوں میں قرآنِ کریم کے معانی کا صوتی ترجمہ سن سکتے ہیں۔ اس میں سورتوں اور آیات کے درمیان آسانی سے منتقل ہونے، مکمل آڈیو فائل یا مخصوص سورت اور آیت کے مطابق آڈیو ڈاؤن لوڈ کرنے کی سہولت بھی موجود ہے، جس سے دنیا بھر کے صارفین کو ایک آسان، لچکدار اور جدید ڈیجیٹل تجربہ حاصل ہوگا۔
ادارے نے وضاحت کی کہ یہ صوتی ترجمہ اعلیٰ معیار کی ریکارڈنگ، واضح ادائیگی اور قرآنی آیات کے معانی کو درست انداز میں منتقل کرنے کی خصوصیات کا حامل ہے، جو ویتنامی اور تاجک زبان بولنے والوں کے لیے قرآنِ کریم کے پیغام کو بہتر طور پر سمجھنے اور اس پر غور و فکر کرنے میں مددگار ثابت ہوگا۔
کمپلیکس نے مزید بتایا کہ قرآنِ کریم کے اس صوتی ترجمے تک اس کے الیکٹرانک پورٹل اور متعلقہ لنک کے ذریعے رسائی حاصل کی جا سکتی ہے۔
نئے صوتی ترجمے کا اجراء شاہ فہد قرآنِ کریم پرنٹنگ کمپلیکس کی ڈیجیٹل خدمات کو وسعت دینے اور اپنے الیکٹرانک مواد کو مزید مؤثر بنانے کی کوششوں کا حصہ ہے۔ اس منصوبے کے تحت جدید ذرائع ابلاغ کے ذریعے مختلف زبانوں میں قرآنِ کریم کے مستند تراجم فراہم کیے جا رہے ہیں، تاکہ قرآنِ کریم کا پیغام اور اس کے معانی دنیا بھر کے مسلمانوں تک زیادہ مؤثر انداز میں پہنچ سکیں۔
واضح رہے کہ شاہ فہد قرآنِ کریم پرنٹنگ کمپلیکس مدینہ منورہ میں واقع ہے اور دنیا کے سب سے بڑے قرآنی اشاعتی مراکز میں شمار ہوتا ہے۔ یہ ادارہ ہر سال قرآنِ کریم کے لاکھوں نسخے شائع کرتا ہے، جبکہ اس کے تراجم بھی مختلف عالمی زبانوں میں شائع اور تقسیم کیے جاتے ہیں۔/
4358086
