مصری باپ اور بیٹے نے عراق کے «العمید» مقابلوں میں میدان مار لیا

ایکنا: ایک مصری باپ اور بیٹے نے بین الاقوامی قرآنی مقابلہ "العمید ایوارڈ" میں نمایاں کامیابی کے احساسات مصری سیٹلائٹ چینل "الحیاۃ" کے ایک پروگرام میں اظہار کیا۔

ایکنا نیوز- التواصل نیوز کے حوالے سے موصولہ رپورٹ میں بتایا گیا ہے کہ معروف مصری ٹی وی میزبان اور میڈیا شخصیت Amr Al-Leithy نے اپنے پروگرام "واحد من الناس" میں ممتاز قاری عزت راشد اور ان کے صاحبزادے السید سے خصوصی گفتگو کی۔

پروگرام کے دوران باپ اور بیٹے نے قرآنِ کریم کی نہایت دلنشین تلاوت پیش کی جسے حاضرین اور ناظرین نے بے حد سراہا۔ ان کی خوبصورت آواز اور روحانی کیفیت سے بھرپور تلاوت نے سامعین کو متاثر کیا اور قرآن سے وابستگی کے اس خوبصورت خاندانی رشتے کو اجاگر کیا۔

12 سالہ السید نے بتایا کہ وہ قرآنِ کریم کے 20 پارے حفظ کرچکے ہیں اور عراق کے بین الاقوامی قرآنی مقابلے "العمید" میں کامیابی کے بعد "دنیا کے ممتاز قاری" کا اعزاز حاصل کرنا اپنے لیے باعثِ فخر سمجھتے ہیں۔

انہوں نے کہا: مجھے یہ اعزاز حاصل کرکے بہت خوشی ہوئی۔ کامیابی کے بعد سب سے پہلے میں نے اپنے وطن مصر کا نام لیا، اور یہی بات مجھے سب سے زیادہ خوشی دیتی ہے۔

نوجوان قاری نے مزید بتایا کہ یہ ان کی زندگی میں پہلی مرتبہ ہے کہ انہیں یہ بین الاقوامی اعزاز حاصل ہوا ہے۔

السید کے والد عزت راشد نے کہا: الحمدللہ، اللہ تعالیٰ نے ہم پر خاص فضل فرمایا ہے۔ گزشتہ سال میں اس مقابلے میں کامیاب ہوا تھا اور اس سال میرے بیٹے نے کامیابی حاصل کی ہے۔ یہ اللہ تعالیٰ کی بہت بڑی نعمت ہے۔

اس پروگرام نے ناظرین پر گہرا اثر چھوڑا اور ان کی بھرپور تحسین حاصل کی۔ یہ منظر دراصل قرآنِ کریم کے دو نسلوں سے وابستہ حافظوں اور قاریوں کی کامیابی کی ایک خوبصورت مثال تھا، جس نے محنت، لگن اور کتابِ الٰہی سے محبت کی اہمیت کو اجاگر کیا۔

واضح رہے کہ العمید ایوارڈ کا انعقاد آستانہ عباسی کے علمی قرآنی اکیڈمی کے زیرِ اہتمام کیا جاتا ہے۔ اس سال رمضان المبارک میں کربلاء نے اس مقابلے کے تیسرے ایڈیشن کی میزبانی کی، جس میں عرب اور غیر عرب ممالک کے قراء نے شرکت کی۔/

4358362