خانہ کعبہ کا نیا غلاف نصب کردیا گیا
ایکنا نیوز- العین نیوز کی رپورٹ میں بتایا گیا ہے کہ غلافِ کعبہ کی تبدیلی کی تقریب گزشتہ شب یکم محرم کی آمد کے ساتھ منعقد ہوئی، جس میں سعودی حکام اور زائرین نے شرکت کی۔ اس موقع پر پرانا غلاف اتار لیا گیا اور نیا غلاف خانۂ کعبہ کی دیواروں پر نصب کر دیا گیا۔
ماضی میں غلافِ کعبہ کی تبدیلی حج کے موسم میں، بالخصوص 9 ذی الحجہ کی صبح اس وقت کی جاتی تھی جب حجاج کرام میدانِ عرفات روانہ ہو جاتے تھے، تاکہ اگلے دن عیدالاضحیٰ کے موقع پر آنے والے نمازیوں اور زائرین کے استقبال کے لیے بیت اللہ کو نئے غلاف سے آراستہ کیا جا سکے۔
تاہم چار سال قبل سعودی عرب کی جنرل پریذیڈنسی برائے امورِ حرمین شریفین نے اس قدیم روایت میں تبدیلی کا اعلان کیا، جس کے تحت غلافِ کعبہ کی سالانہ تبدیلی کی تقریب کو نئے ہجری سال کے آغاز، یعنی یکم محرم الحرام کی شب سے منسلک کر دیا گیا۔
چنانچہ اب ہر سال نئے ہجری سال کے آغاز پر کسوۂ کعبہ کی تبدیلی کی یہ روح پرور اور تاریخی تقریب منعقد کی جاتی ہے، جسے دنیا بھر کے مسلمان خصوصی عقیدت اور دلچسپی سے دیکھتے ہیں۔/
4358691
