İranda İslam İnqilabının ildönümü münasibətilə bayram yürüşü - FOTO
Bu gün İslam İnqilabının 39-cu ildönümü münasibətilə İranda təntənəli bayram tədbirləri keçirilib. İranın bütün şəhərlərində keçirilən bayram tədbiri xalqın izdihamlı yürüşü ilə günortayadək davam edib.
İQNA-nın (Beynəlxalq Quran Xəbər Agentliyi) verdiyi xəbərə görə, bu gün İslam İnqilabının 39-cu ildönümü münasibətilə İranda təntənəli bayram tədbirləri keçirilir.
Paytaxt Tehran şəhərində yerli vaxtla səhər saat 09:00-da yerli və xarici qonaqların iştirakı ilə rəsmi açılış mərasimi keçirilib.
Hazırda paytaxt Tehran şəhərinin müxtəlif xiyabanlarından vətəndaşlar Azadlıq meydanına tərəf axın edir. Onlar “İstiqlal, Azadlıq, İslam Respublikası!”, “Amerikaya ölüm!”, “İsrailə ölüm” və s. şüarlar səsləndirir. Bundan əlavə, eyni vaxtda İranın 1000 şəhər və qəsəbəsində, eləcə də 4 min kəndində bayram mərasimləri və yürüşləri keçirilir.
Ümumilikdə bu mərasimləri 6000 jurnalist işıqlandırır. Onlardan 2750 yerli jurnalist və həmçinin 25 ölkədən gəlmiş 250 jurnalist yalnız paytaxt Tehrandakı yürüşlə bağlı foto, xəbər və film hazırlayır. 3000 jurnalist isə digər əyalət və şəhərlərində İran xalqının milyonluq 22 Bəhmən yürüşü ilə bağlı xəbərləri işıqlandırırlar.
