“İQNA”-nın İmam Əlinin (ə) ziyarətgahının informasiya portalına istinadən verdiyi xəbərə görə, İmam Əlinin (ə) hərəminin xidmətçilərindən Həsən Zəki bu barədə deyib: “Dəstək bölmələri ilə koordinasiya çərçivəsində İslam Peyğəmbərinin (s) vəfatı gecəsində 100-dən çox əzadarlıq dəstəsinin hərəkəti və keçidi təmin edilib. Onlardan səkkiz böyük dəstə əzadarlıq mərasimlərini mübarək hərəmin daxilində keçirib, digər dəstələr isə Həydəri həyətinin ətraf ərazisinə daxil olublar.”

İmam Əlinin (ə) ziyarətgahının digər xidmətçisi Əli Əbd Zeyd Kazım da bildirib: “Ələvi müqəddəs ziyarətgahı Əmirəlmömininin (ə) məzarını ziyarət etmək üçün gələn zəvvarlara ən yaxşı xidmətlərin göstərilməsi üçün bütün imkanlarını səfərbər edib.”

O izah edib ki, bu xidmətlərə gündə üç dəfə yeməyin — əsas yeməklər və ara qidalar daxil olmaqla — paylanması, həmçinin zəvvarların istirahəti və gecələməsi üçün yerlərin təmin edilməsi daxildir. Bununla da ziyarət müddətində zəvvarların rahatlığının təmin olunması məqsədi güdülür.

Əli Əbd Zeyd Kazımın sözlərinə görə, bu fəaliyyətlər Səfər ayının 10-da başlayıb və Peyğəmbərin (s) vəfatının ildönümü münasibətilə keçirilən əhya mərasiminin sonunadək davam edəcək.

Qeyd edək ki, bu səylər Ələvi müqəddəs ziyarətgahının Ərbəin ziyarəti və İslam Peyğəmbəri Həzrət Məhəmmədin (s) vəfatının ildönümü ziyarəti zamanı zəvvarlara xidmət göstərmək üçün hazırladığı xidmət planı çərçivəsində həyata keçirilir.

 

4369373