81 mindən çox zəvvar Ərbəin Quran stansiyalarından faydalanıb
"İQNA"nın İraqdan verdiyi məlumata görə, bu layihə İmam Hüseynin (ə) Ərbəin ziyarəti zamanı 81 min nəfərdən çox şəxsə xidmət göstərib. Layihənin proqramları Kərbəla və İraqın bir neçə digər əyalətində yerləşən 90 stansiyada fəaliyyət göstərən 750 qadın və kişi Quran müəlliminin iştirakı ilə həyata keçirilib.
İmam Hüseyn (ə) hərəminin Darül-Quran mərkəzinin rəhbəri Şeyx Xeyrəddin əl-Hadi bildirib ki, Quran stansiyalarına göstərilən geniş maraq layihənin Quran mesajını zəvvarlara çatdırmaqda uğurlu olduğunu təsdiqləyir.
O, qeyd edib: "Müəssisənin əməkdaşları yeddi gün ərzində maarifləndirmə, Quran və tədris xidmətləri göstərmək üçün böyük səylə çalışdılar ki, bu da qiraətlərin düzəldilməsinə, dini və mədəni şüurun güclənməsinə kömək etdi."
Əl-Hadi əlavə edib: "Bu layihə yeddi beynəlxalq və 47 yerli Quran məclisi daxil olmaqla, geniş fəaliyyət spektrini əhatə edib. Bundan əlavə, müəssisə 23 müsabiqə və seminar, eləcə də müxtəlif Quran və dini mövzularda 82 maarifləndirici çıxış təşkil edib və zəvvarlar arasında 25 mindən çox mübarək hədiyyə paylayıb."
O vurğulayıb ki, bu layihənin illik nailiyyətləri gələcək münasibətlərdə xidmətlərin daha da inkişaf etdirilməsi və genişləndirilməsi üçün bir stimuldur və Hüseyn zəvvarlarına təqdim olunan Quran proqramlarını daha da gücləndirəcək.
Əl-Hadi sonda xatırladıb: "Bu layihə həm də İmam Hüseyn (ə) müqəddəs hərəminin Quran mədəniyyətini yaymaq və onun dəyərlərini cəmiyyətdə kökləşdirmək missiyasının təzahürüdür."
4368544
