Fransa ölkənin nüfuzlu müsəlman məktəbinə ictimai dəstəyi kəsməyə hazırlaşır
“TRT Xəbər” və “Le Figaro”nun verdiyi məlumata görə, Hauts-de-France Region valiliyi, universitetə qəbul olma müvəffəqiyyəti yüzdə 90-dan çox olan Lille şəhərindəki Özəl Averroes Liseyi ilə dövlətin müqaviləsini ləğv etmək üçün addımlar atır.
Valiliyin göstərişi ilə toplanan xüsusi təhsil məşvərət komissiyası dünən məktəbdə çalışan müəllim və işçilərin maaşlarının dövlət tərəfindən ödənilməsinə icazə verən müqavilənin ləğvinə səs verib.
Komissiya üzvlərinin əksəriyyəti məktəblə 2008-ci ildə bağlanmış müqavilənin ləğvinin lehinə səs verib.
Müqavilənin dayandırılmasına səbəb kimi məktəbə edilən ianələrlə bağlı şəffaflığın olmaması və respublika dəyərlərinə zidd olan “Sələfi təlimi”nin dərslərə salınması göstərilir.
Məsələ ilə bağlı Fransa Müsəlmanları Federasiyasından verilən yazılı açıqlamada Averroes Liseyinin müəllimləri ilə həmrəy olduqları bildirilib.
Açıqlamada komissiyanın müqavilənin ləğvi ilə bağlı qərarının təkcə uğurları ilə seçilən müsəlman təhsil ocağının deyil, bütün özəl qurumların gələcəyi üçün həyəcanlı mesaj olduğu bildirilib.
2003-cü ildə təhsil həyatına başlayan məktəb hicablı olduğu üçün başqa təhsil müəssisələrinə gedə bilməyən müsəlman tələbələrə ilk olaraq qapılarını açıb. Bir neçə ildə şagird sayını artıran liseylə yanaşı, Averroes orta məktəbi də 2012-ci ildə fəaliyyətə başlayıb. Bu gün 800-dən çox şagird Averroes Liseyi və Orta Məktəbində təhsil alır.
