İstanbulda “İmam Hüseyn (ə) məhəbbəti – İslam birliyinin rəmzi” mövzusunda tədbir keçirilib
“İQNA”-nın “imamhussain.org” saytına istinadla verdiyi xəbərə görə, bu toplantı “Əl-əlbeyt” Fondu ilə birgə əməkdaşlıq çərçivəsində keçirilib və müxtəlif İraq dini, mədəni və media nümayəndələrinin geniş iştirakı ilə müşayiət olunub. İmam Hüseyn (ə) Məqbərəsinin nümayəndəsi olaraq şeyx Əli Qarəavi çıxış edib və bu beynəlxalq mədəni təşəbbüsün Hüseyni düşüncənin qlobal səviyyədə təbliğindəki əhəmiyyətini izah edib.
İmam Hüseyn (ə) Məqbərəsinin Media şöbəsinin sədr müavini Həsən Nəməx Xəfəci bu barədə bildirib: “İstanbulda keçirilən toplantı müqəddəs Hüseyn (ə) Məqbərəsinin proqramlarının bir hissəsi kimi təşkil olunub və məqsədi İmam Hüseyn (ə) hərəkatının mədəni kimliyini müsəlman azlıqlar arasında möhkəmləndirməkdir”.
O əlavə edib: “İmam Hüseyn (ə) məhəbbəti – İslam birliyinin rəmzi” şüarı bu toplantının əsas mövzusu seçilmişdir ki, İmam Hüseyn (ə) hərəkatının bəşəri və sərhədləri aşan yönünü ön plana çıxarsın. Biz bu tədbirdə elan etdik ki, İmam Hüseyn (ə) çağırışı müəyyən bir məzhəbin səsi deyil, əksinə bütün azad insanlar üçün insani bir nidadır.
Xəfəci əlavə edib ki, İmam Hüseyn (ə) Məqbərəsinin Media şöbəsi həqiqəti çatdırmaq məqsədilə texnologiyalardan istifadə edərək öz vəzifəsini müxtəlif dillərdə yayımlanan peyk kanalları və minbərlərlə həyata keçirir və Hüseyni hərəkatın əsaslarını və prinsiplərini dünyaya çatdırmağa çalışır.
O, İstanbulda İmam Hüseyn (ə) Mədəniyyət Mərkəzinin açılışına toxunaraq qeyd edib: “Bu mərkəz Türkiyə cəmiyyəti ilə mədəni və media əlaqə körpülərini genişləndirmək istiqamətində fəaliyyət göstərmək məqsədilə açılıb. Gələcəkdə bir neçə ölkədə daha bu kimi mərkəzlərin təsis olunması planlaşdırılır. Bu mərkəzlər Kərbəlanın səsini və onun bəşəri mesajını dünya mədəniyyətlərinə çatdırmaqda önəmli rol oynayacaq”.
Qeyd edək ki, İmam Hüseyn (ə) Məqbərəsinin Media şöbəsi həm İraq daxilində, həm də xaricində mədəni və media fəaliyyətlərini dəstəkləməyə davam edir ki, İmam Hüseyn (ə) mesajını beynəlxalq səviyyədə daha geniş şəkildə təbliğ etsin və birlik, birgəyaşayış, ədalət və insan ləyaqəti kimi dəyərlərə əsaslanan ictimai maarifləndirməni gücləndirsin.
4294641
