Şarcə peyk televiziyasında iki Quran xətm layihəsi həyata keçirilib
“İQNA”-nın “Əl-Xəlifə” xəbər agentliyinə istinadla verdiyi məlumata görə, Şarcə Radio və Televiziya Təşkilatına bağlı olan Şarcə Quran radiosu və peyk televiziyası, Allahın kitabına xidmət məqsədilə yeni bir layihəni tamamlayaraq, bəhreynli qari Əli Salah Ömər və Birləşmiş Ərəb Əmirliklərindən olan Şeyx İzzəddin əl-Əvvaminin səsi ilə iki tam Quran tilavətini (xətm Quran) qeydə alıb.
Bu iki xətm, bir il ərzində texniki heyətlə Quran qiraəti və təcvid üzrə mütəxəssislər arasında aparılmış dəqiq əməkdaşlığın nəticəsidir.
Bu layihə, Şarcə Quran Radiosunun, BƏƏ daxilində və xaricində dinləyicilərin istəklərinə cavab vermək məqsədilə dəqiq Quran tilavətlərini təqdim etmək üçün göstərdiyi davamlı səylərin bir hissəsidir.
Həmçinin bu iki radio qeydiyyatı, qarilər üçün öz səsləri ilə tam Quran xətmi yazdırmaq arzularının reallaşmasını təcəssüm etdirir və onların səslərinin radio dalğaları vasitəsilə əbədiləşdirilməsinə xidmət edir.
Əli Salah Ömər, Bəhreynin tanınmış qarilərindəndir, bu ölkənin “Əl-Fatih” məscidinin imamıdır. O, bir neçə qiraət üsulunda ustadır və təsiredici səsi ilə seçilir.
Şeyx İzzəddin əl-Əvvami isə Şarjahın Xan bölgəsində yerləşən “Əl-Ülfə” məscidinin imamı və xətibidir. O, təvazökar tərzdə tilavəti və yüksək səviyyəli səs və nəğmə keyfiyyəti ilə tanınır və son illərdə, xüsusən Ramazan ayında təravih namazlarındakı çıxışları ilə yeni nəsil qarilər sırasında yer alıb.
Şarcə Quran Radiosu bu layihə çərçivəsində sosial şəbəkələrdə sorğu keçirib və həmin sorğuda bu iki qari, dinləyicilərin səsi ilə tam Quran xətmini onların səsi ilə dinləmək istədikləri qarilər siyahısında birinci yerdə qərarlaşıblar.
Layihənin icrası bir il davam edib və dəqiq qeyd, yoxlama və istehsal mərhələlərini əhatə edib. Qeyd prosesləri radio studiyalarında aparılıb və tilavət mütəxəssisləri və Quran elmləri üzrə ixtisaslaşmış nəzarətçilər tərəfindən diqqətlə qiymətləndirilib.
Texniki redaktə və səs tənzimləməsindən sonra iş, Şeyx Tahir əl-Əsiyutinin rəhbərlik etdiyi Quran tilavəti və sertifikatlaşdırması üzrə ixtisaslaşmış komitəyə təqdim edilib.
Qeyd edək ki, BƏƏ-də radio tilavəti üçün qarilərin seçimi dəqiq bir prosedura əsasən həyata keçirilir. Namizədlərin sınaq tilavətləri, Şarcə Quran Akademiyası, İslam İşləri İdarəsi, Qasimiya Universiteti, Şarcə Quran və Sünnə Fondu və Şarcə Radio Şəbəkəsinin nümayəndələrindən ibarət komitəyə təqdim olunur.
Bu komitənin yekdil qərarı olmadan heç bir qari təsdiqlənmir və təsdiqlənmək üçün ən yüksək səviyyədə səs keyfiyyəti və təcvid qaydalarına ciddi riayət tələb olunur.
4296807
