ABŞ-lı bəzi siyasətçilərin Nyu-York meri seçkilərində müsəlman namizədə dəstəyi
“CNN”-in xəbərinə görə, 33 yaşlı Zahran Məmdani Nyu-Yorkda seçki kampaniyasını ayrı-seçkilik dalğası fonunda davam etdirir. O, sosial şəbəkələrdə qarşılaşdığı hücumlara baxmayaraq, Demokratların ilkin seçkilərində böyük uğur qazanıb, güclü rəqiblərini geridə qoyub və indiyə qədər heç olmadığı qədər Nyu-Yorkun ilk müsəlman meri olmağa yaxınlaşıb.
Eyni zamanda, Konqresin bəzi üzvləri və insan haqları qrupları demokrat namizədə qarşı yönəlmiş islamofob və irqçi hücumları qınayıb.
Konqresin müsəlman üzvləri – Rəşida Tlaib, İlhan Omar, Andre Karson və Latifah Simon – ortaq bəyanatda respublikaçı qanunvericilər və ifrat sağçı simaların “kobud və təhlükəli ritorikasını” pisləyiblər. Bəyanatda deyilir: “Təhqir, islamofobiya və irqçilik siyasətimizdə kök salıb. Biz bu hücumları öz təcrübəmizdən yaxşı tanıyırıq.”
33 yaşlı Məmdani Hindistan əsilli müsəlmandır. O, uqandalı ustad Mahmud Məmdaninin və hind əsilli kinorejissor Mira Nayarın oğludur.
Məmdani 432 min səs (43,5%) toplayaraq Demokratların ilkin seçkilərində birinci olub və Nyu-York ştatının sabiq qubernatoru Endryu Kuomonu məğlub edib. Respublikaçıların hücumları hətta Məmdanini 11 sentyabr hücumları ilə əlaqələndirməyə qədər gedib çıxıb. Vətəndaş hüquqları qrupları xəbərdarlıq ediblər ki, belə təxribatçı ritorika fiziki qarşıdurmalara səbəb ola bilər. Məmdani 4 noyabrda keçiriləcək ümumi seçkilərdə respublikaçı namizəd Kertis Sliva ilə yarışacaq. O qalib gəlsə, Nyu-York tarixində ilk müsəlman və ilk hind əsilli mer olacaq.
Məmdani Demokratların namizədliyi uğrunda apardığı kampaniya zamanı Nyu-Yorkda orta təbəqə üçün yaşayış xərclərinin azaldılacağına söz verib. O, həmçinin dəfələrlə Qəzza müharibəsi ilə bağlı danışaraq fələstinlilərə dəstəyini ifadə edib və açıq şəkildə sionist rejimi tənqid edib.
Bundan əvvəl Məmdani İsrail universitetlərinin akademik boykotuna çağırıb və mer seçildiyi təqdirdə Netanyahu Nyu-Yorka səfər etsə, onun həbsi üçün çalışacağına söz verib.
4300869
