Əlcəzairdə 900 mindən çox Quran öyrənəni fəaliyyət göstərir
“Əl-Məsa” xəbər verir ki, Əlcəzairdə Quran tədrisi sürətlə genişlənir. Hazırda bu ölkədə 900 mindən çox Quran öyrənəni müxtəlif məktəb və Quran mərkəzlərində qeydiyyatdan keçib. Eyni zamanda, dövlətin dəstəyi və tədris təşəbbüsləri nəticəsində Quran hifzi və qiraəti sahəsində beynəlxalq yarışlarda əlcəzairli hafiz və qarilərin nailiyyətləri xeyli artıb.
Əlcəzairin dini işlər və vəqflər naziri Yusif Bəlməhdi Əlcəzair şəhərindəki “Bir Murad Rais” məhəlləsində yerləşən “Əhməd Səhnun Quran evi”ndə keçirilən 2025–2026-cı illər Quran tədrisi ilinin açılış mərasimində çıxış edib.
Nazir bildirib ki, ölkədə Qurani-Kərimin öyrədilməsi və hifz olunması üçün ayrılmış məktəb, mərkəz və institutların sayı 27 minə çatıb. Bu rəqəmə yay tətili dövründə fəaliyyət göstərən Quran məktəbləri də daxildir. Onun sözlərinə görə, bu tədris müəssisələrində qeydiyyatdan keçmiş şagirdlərin sayı 900 mindən artıqdır.
Nazirin qeyd etdiyinə görə, ötən tədris ilində müxtəlif Quran tədris müəssisələrində 1,2 milyondan çox oğlan və qız şagird qeydiyyatdan keçib. O, Əlcəzairli şagirdlərin beynəlxalq Quran hifzi və qiraət yarışlarında əldə etdikləri yüksək nəticələri, Quran tədrisinə dövlətin verdiyi dəstəyin müsbət nəticəsi kimi qiymətləndirib.
Bəlməhdi əlavə edib ki, “Əhməd Səhnun Quran evi” hər il təxminən 3 min hafiz və şagirdə tədris verir. Buraya müxtəlif təhsil səviyyələrindəki dərslər və savadlılıq kursları da daxildir. O, paytaxtda və ölkənin digər vilayətlərində Quran məktəblərinə qeydiyyatın davamlı şəkildə artdığını bildirib.
Nazir həmçinin “Əl-Qilitus” bölgəsindəki “Nur əl-Huda” məscidində və “əl-Muhəmmədiyyə” bölgəsindəki “əl-Birr” Quran məktəbində yeni Quran tədris mərkəzlərini açıb. O, bu kimi dini və tədris layihələrinə dəstək verən xeyriyyəçilərə və yerli rəhbərlərə təşəkkür edərək bildirib ki, bu fəaliyyətlər Əlcəzair xalqında əxlaqın möhkəmlənməsinə və dini kimliyin qorunmasına xidmət edən yeni bir nəsil formalaşdırır.
4309400
