Belçika rəsmi şəkildə İsrailin soyqırımı ilə bağlı məhkəmə işində hüquqi müttəfiq oldu
“İQNA”-nın “Əl-Cəzirə”yə istinadla verdiyi xəbərə görə, Beynəlxalq Ədalət Məhkəməsi açıqlayıb ki, Belçika dövləti “Qəzza zolağında Soyqırım cinayətinin qarşısının alınması və cəzalandırılması haqqında Konvensiyanın tətbiqi” adlı iş üzrə rəsmi müdaxilə bəyanatını qeydiyyata alıb. Bu iş Cənubi Afrika tərəfindən sionist rejimə qarşı məhkəməyə təqdim olunmuşdur.
Bu bəyanat 23 dekabr 2025-ci il, çərşənbə axşamı günü qeydiyyata alınıb və dərc olunub. Belçika Məhkəmənin Nizamnaməsinin 63-cü maddəsinə əsaslanaraq işin araşdırılmasında iştirak etmək istədiyini bildirib. Həmin maddəyə görə, beynəlxalq müqavilənin şərhində maraqlı olan hər bir dövlət müdaxilə bəyanatı təqdim etməklə öz hüquqi mövqeyini Məhkəməyə təqdim edə bilər.
Belçikanın qoşulmasının hüquqi əsasları
Belçikanın bu işə qoşulması birbaşa olaraq 1948-ci ildə qəbul edilmiş Soyqırım cinayətinin qarşısının alınması və cəzalandırılması haqqında Konvensiyanın icrasında bu ölkənin roluna bağlıdır. Məhkəmə daha əvvəl Cənubi Afrikanın şikayətini araşdırmış və əsas diqqətini İsrailin Qəzzadakı hərbi əməliyyatları ilə əlaqədar bu Konvensiyanın şərhi və tətbiqinə yönəltmişdir.
Avropa İttifaqının mühüm üzvlərindən biri olan və Fələstinlə tarixi əlaqələri olan Belçikanın bu addımı işin Haaqa Məhkəməsində hüquqi və siyasi çəkisini artıra bilər. Bu ölkə ənənəvi olaraq İsrailin fələstinlilərə qarşı siyasətlərinə tənqidi mövqe sərgiləyib.
Cənubi Afrikanın sionist rejimə qarşı ilkin şikayəti ilə başlayan bu iş araşdırmaların başlanmasından bəri beynəlxalq diqqəti cəlb edib. İddiaçıların – və indi Belçikanın – əsas məqsədi Haaqa Məhkəməsinin İsrail rejimini Qəzzada müharibəni və soyqırım cinayətlərini dərhal dayandırmağa məcbur etməsi, həmçinin fələstinlilərin və Qəzza sakinlərinin müdafiəsi üçün müvəqqəti tədbirlər görməsidir.
Bu hüquqi inkişaf o şəraitdə baş verir ki, işğalçı İsrail rejiminə qarşı beynəlxalq humanitar hüquq normalarına riayət etməsi üçün təzyiqlər getdikcə artır.
4324706
