Məkkə Qurani-Kərim Virtual Tədris Mərkəzindən 88 ölkənin faydalanması
“İQNA”-nın “əl-Mədinə” qəzetinə istinadən verdiyi xəbərə görə, “Ümmül-Qura” Universitetinin Qurani-Kərim Virtual Tədris Mərkəzi 2025-ci ildə mühüm nailiyyət əldə edib və öz mövqeyini təcvid qaydalarına uyğun Quran tilavətinin öyrədilməsi üçün rəqəmsal platforma kimi möhkəmləndirib. Eyni zamanda, ixtisaslı müəllimlərin nəzarəti altında tilavətin dərhal düzəldilməsi xidmətini təqdim edib.
Statistik göstəricilərə əsasən, dünyanın 88 ölkəsindən 15 min 201 nəfər qız və oğlan Quran öyrənən bu mərkəzin proqramlarından faydalanıb. Bu, proqramın geniş qlobal əlçatanlığını və müxtəlif təbəqələrdən olan Quran öyrənənlərə xidmət göstərmək imkanını nümayiş etdirir.
Mərkəzin tədris proqramlarında 80 nəfər kişi və qadın müəllim iştirak edib və ümumilikdə 3424 saatlıq tədris müddətində 23 min 229 səhifə Qurani-Kərim öyrədilib. Tədris əsasən təcvid qaydaları və hərflərin düzgün məxrəclə tələffüzünə yönəlib.
Bu fəaliyyətlər universitetin rəqəmsal öyrənmə vasitələrinin inkişafına verdiyi önəmin bir hissəsi kimi həyata keçirilib. Mərkəzin proqramları, xüsusilə uzaq bölgələrdə və üzbəüz öyrənmə imkanlarından məhrum olan yerlərdə Quran tədrisinə etibarlı çıxışı artırıb.
“Ümmül-Qura” Universitetinin Qurani-Kərim Virtual Tədris Mərkəzi, çoxsaylı Quran öyrənənlərin tilavət bacarıqlarının yüksəldilməsinə kömək edib. Müəllimlərin davamlı nəzarəti və birbaşa yönləndirməsi ilə onlara düzgün tilavət üsulları öyrədilib və Allahın Kitabı ilə şüurlu ünsiyyət gücləndirilib.
Bu mərkəz universitetin Qurana xidmət, Quran elmlərinin tədrisi və yayılması, həmçinin onun elmi və təbliğ missiyasının yüksəldilməsi istiqamətindəki səyləri çərçivəsində təsis olunub.
1981-ci ildə təsis edilən “Ümmül-Qura” Universiteti Məkkə metropoliyasında yerləşən dövlətə məxsus, qeyri-kommersiya ali təhsil müəssisəsidir. Universitet 1981-ci ildə Səudiyyə Ərəbistanı kralının fərmanı ilə İslam Şəriəti Fakültəsinin birləşdirilməsi nəticəsində yaradılıb və adını dəyişib.
4327390
