Evliliyin dəstəklənməsi üçün iordaniyalı sahibkarın Qurani-Kərim təşəbbüsü
“İQNA”-nın “əl-Vətən” qəzetinə istinadən verdiyi xəbərə görə, iordaniyalı sahibkar Leys Duvaykat evliliyi və ailə qurulmasını dəstəkləmək məqsədilə yeni bir sosial və inkişaf layihəsinə start verib. Bu layihə hər ay gənclərin evlənməsini təşviq etməyi hədəfləyir, şərt isə Qurani-Kərimin altı cüzünün əzbərlənməsidir. Bu addım dini, ictimai və iqtisadi baxımdan əhəmiyyət daşıyır.
Layihə bir video vasitəsilə elan olunub və sabit aylıq məbləğin ayrılmasına əsaslanır. Bu məbləğ İordaniyada və ölkə xaricində layihəyə ayrılmış filiallarda satışdan toplanır. Hər filial gündəlik 20 iordaniya dinarı xüsusi fonda köçürməyə öhdəlik götürür.
Layihənin icraçılarına görə, toplanan ümumi məbləğin hər ay təqribən 6000 iordaniya dinarına çatacağı gözlənilir.
Layihənin qurucusu izah edib ki, bu məbləğ iki hissəyə bölünəcək. Birinci hissə — 3000 iordaniya dinarı — evlilik meyarlarına cavab verən və Qurani-Kərimin altı cüzünü əzbərləmiş gəncə yardım üçün ayrılacaq. Bu, dini və əxlaqi dəyərlərin sabit ailə qurmaq üçün möhkəm təməl olduğuna inamı əks etdirir.
İkinci hissə isə gənclərin və ya ailələrin istehsal və ya ticarət layihəsinə dəstək göstərmək, iqtisadi müstəqilliyi artırmaq və cəmiyyətin inkişafına kömək etmək məqsədilə ayrılacaq.
Leys Duvaykat bildirib ki, bu layihə ailənin cəmiyyətin nüvəsi olduğuna inamdan qaynaqlanır. Evliliyin və yerli istehsalın dəstəklənməsi sosial dağılma və iqtisadi təzyiqlərə qarşı mühüm müdafiə xəttidir.
İordaniyalı sahibkar vurğulayıb ki, bu layihə ənənəvi xeyriyyə işi deyil, cəmiyyətin yaşaması və qurulması üçün bir layihədir.
O, həmçinin deyib: bu təşəbbüs uzunmüddətli şəkildə davam edəcək və resurslar əlçatan olduqca, onun tədricən genişləndirilməsi üçün proqramlar həyata keçiriləcək.
Bu addım İordaniya gənclərinin evliliyə marağının azalması, sosial müzakirələrin güclənməsi və iqtisadi çətinliklərin artdığı bir vaxtda atılıb. Layihə sosial həmrəylik, dini dəyərlər və davamlı inkişafı birləşdirən fərqli bir model təqdim edir.
4327116
