A.S.E.A.N Quran müsabiqəsinin qalibləri təqdir olunub
“İQNA”-nın “Bernama” agentliyinə istinadən verdiyi xəbərə görə, A.S.E.A.N ali təhsil müəssisələri arasında keçirilən Qurani-Kərim tilavəti və hifzi (Huffaz) müsabiqəsinin (MTHQ IPT ASEAN) 2025/2026-cı il üzrə qalibləri müəyyənləşib.
23 yaşlı Məhəmməd Hamiz Mirza Sudirman – Bruneydəki Sultan Şərif Əli İslam Universitetinin (UNISSA) ikinci kurs tələbəsi – kişilər arasında birinci yeri tutub.
22 yaşlı Rəşda Nuha Ramli – Sultan İdris Təhsil Universitetinin (UPSI) Qurani-Kərimin hifzi və qiraəti ixtisası üzrə bakalavr tələbəsi – qadınlar arasında qalib olub.
Hər iki qalib bazar günü Sultan Zəynəlabidin Universitetində (UniSZA) keçirilən mərasimdə Malayziya İslam İnkişafı İdarəsinin (JAKIM) baş direktoru Siracəddin Sehimidən 2000 Malayziya rinqgiti və fəxri diplom alıblar.
Məhəmməd Hamiz bu uğurunu 48 yaşlı atası Sudirman Matusinə – Qurani-Kərimi öyrənməyə başlamazdan əvvəl ilk müəlliminə – həsr etdiyini bildirib.
O deyib: “Qurani-Kərim tilavətinə 10 yaşımda başlamışam. Bu uğur mənim üçün xüsusilə dəyərlidir, çünki yüksək səviyyəli yarışda ilk təcrübəmdir.” O əlavə edib ki, bir ay ərzində hər gün məşq edib və eyni zamanda dərslərini də davam etdirib.
Selanqorun Sunqai Besar bölgəsindən olan Rəşda bildirib ki, semestr imtahanlarına görə cəmi bir həftə məşq etməyə vaxtı olub. O, gəncləri Qurani-Kərimi gündəlik həyatlarına daxil etməyə təşviq edərək deyib: “Əsas çətinlik müxtəlif nəğmə və üslublarla tilavətə tam hakim olmaq idi. Bir müddət məşq etməmişdim, ona görə də qalib gəlmək mənim üçün xoş bir sürpriz oldu.”
Siracəddin bildirib ki, bu il MTHQ IPT ASEAN müsabiqəsinin üçüncü dəfə keçirilməsində 50 ali təhsil müəssisəsindən 211 iştirakçı qatılıb və onlardan 52-si final mərhələsinə yüksəlib.
O deyib: “İlk dəfə olaraq, digər A.S.E.A.N ölkələrindən – o cümlədən İndoneziya və Bruneydən – tələbələr yarışda iştirak etdilər. İştirakçılar İslamşünaslıqdan tutmuş mühəndislik, tibb və informasiya texnologiyalarına qədər müxtəlif akademik sahələri təmsil edirdilər ki, bu da regionun gələcək liderləri üçün ümidverici göstəricidir.”
4335046
