Sionist rejimin BMT baş katibinin ofisi ilə əlaqələri kəsməsi
İQNA-nın Fələstin "Məən" xəbər agentliyinə istinadən verdiyi xəbərə görə, İsrail rejiminin Xarici İşlər Nazirliyi bəyanatında bildirib: "Birləşmiş Millətlər Təşkilatının Baş katibinin ofisi ilə əlaqələrimizi kəsmək qərarına gəlmişik."
Sionist rejimin Xarici İşlər Nazirliyi bu qərarın İsrail qurumlarının münaqişələr zamanı cinsi zorakılıqla bağlı hesabatın əlavəsinə daxil edildikdən sonra verildiyini əlavə edib.
Nazirlik BMT-nin Baş katibi Antonio Quterreşi son aylar ərzində BMT-nin Baş katibi kimi sionist rejimə qarşı əsassız ittihamlar irəli sürmək üçün öz mövqeyindən sui-istifadə etməkdə günahlandırıb.
Bundan əvvəl sionist rejimin mediası Birləşmiş Millətlər Təşkilatının bu rejimin adını bir daha münaqişə zonalarında cinsi zorakılıq törədən ölkə və təşkilatların qara siyahısına saldığını açıqlamışdı.
Sionist rejimin BMT-dəki səfiri Danny Danon bu addımı siyasi qərar kimi dəyərləndirib və İsrailin hər bir iddia üzrə sübut, sənəd və dəqiq cavablar təqdim etdiyini iddia edib.
Sionist "Yedioth Ahronoth" qəzeti yazır ki, İsrail BMT-nin Baş katibi Antonio Quterreşin İsrailin adını bu qara siyahıya salmaq üçün təzyiq altında qaldığını iddia edir.
Bu qara siyahı adətən avqust ayında dərc edilən və hökumətlərin və ya təşkilatların ən azı bir il müddətinə bu siyahıda qaldığı "Münaqişə ilə əlaqəli cinsi zorakılıq" mövzusunda BMT baş katibinin illik hesabatının əlavəsinin bir hissəsidir. Keçən ilin siyahısında ümumilikdə 63 dövlət və qeyri-dövlət aktoru qara siyahıya salınmışdı.
Ötən ay isə hüquqi hesabat sionist rejimin hərbçiləri tərəfindən işğal altındakı Qərb Sahilində fələstinliləri öz torpaqlarını tərk etməyə məcbur etmək üçün məqsədyönlü vasitə kimi cinsi zorakılığın tətbiqinin güclənməsi faktlarını üzə çıxarmışdı.
4354849
